يعانى أهالى منطقة عبدالغفور أمام مركز شباب بشتيل البلد، من طفح المجارى منذ فترة، ما دفع السكان للتقدم بعدد من الشكاوى والاستغاثات للمسئولين الذين لم يحركوا ساكنا، وهو ما أدى لانتشار الحشرات وتفاقم الأزمة.
تقول "أم عمرو" ٥٧ عاما إحدى سكان المنطقة: "لما بنزل أشترى طلبات البيت أوقات كتير بعجز عن المشى في الشارع بسبب المجارى المتراكمة والرائحة القاتلة".
ويضيف "محمد"، ٣٩ عاما: "إحنا تعبنا من ريحة المجارى هنا، غير إن عندنا أطفال تعبانة وعندنا حساسية، وفى ناس سنها كبير ومبتعرفش تتحرك لما بتكون الدنيا غرقانة، وبنتحرج جدا لما حد يجى يزورنا ويشم الريحة ولا يشوف المنظر ده، أرجو من المسئولين أن ينظروا لحالنا اللى ما يرضيش حد، رغم أنه شارع كبير وفى مركز الشباب، ومدرسة المجد الابتدائية ويؤدى للكثير من الشوارع الجانبية".
وقال "محمود"، ٤٤ عاما: "الشارع هنا واسع، يعنى المفروض يكون في خدمات أكتر من كده، وبعدين دى مش أى حاجة عادية، دى مجارى، المفروض إن يكون في اهتمام أكتر من المسئولين، مش نمشى عليها وأحيانا تدخل البيوت والورش والمحلات، يا ريت حد يتفهم ويسمع شكوتنا، بدل ما حالنا كده".
وطالب أهالى المنطقة المسئولين بسرعة التحرك للقضاء على المشكلة التى تتكرر بصفة دورية، حفاظا على صحة المواطنين.
