أعلنت المطربة إيناس عز الدين إحدي نجمات برنامج "أراب أيدول"، إصابتها بفيروس "كورونا"، وذلك عقب عودتها من المغرب، بعد أن كانت محتجزة في المطار، وبمجرد عودتها شعرت بأعراض الفيروس، وخضعت للتحاليل التي أكدت انها مصابة بالفعل بالفيروس، جاء ذلك خلال فيديو "لايف" منذ قليل على حسابها الشخصي على "فيس بوك".
وكتبت إيناس: "الحمد لله حتى الآن انا حالتي مستقرة إلى حد ما وفي حجر منزلي لوحدي ومش بختلط بأي شخص وبلتزم بالإجراءات الوقائية المُتبعة وكل ده طبعًا بالمتابعة مع وزارة الصحة الا اذا الحالة سائت ساعتها بيحصل عزل طبي في احدى مستشفيات الحجر الصحي وده الاجراء المتبع من قبل وزارة الصحة معايا ومع ناس كتير وده بروتوكول مُتبع في العالم كله مش في مصر بس ان الحالات السيئة بس هي اللي بتدخل عزل صحي في مستشفيات ومافيش حاجة اسمها لو مريضة انزل اي مستشفى عادية جنب بيتي".
وأضافت: "نزولي المستشفى وانا مصابة معناها اني هعدي كل شخص في طريقي ومافيش مستشفى مجهزة انها تستقبل حالات الا المستشفيات المخصصة من قبل وزارة الصحة ودي الوزارة اللي بتحول عليها الحالات اللي محتاجة انها تتعزل في مستشفى والفايرس ليه درجات فيه درجات بتتابع من البيت مع وزارة الصحة وبيتعملها حجر صحي منزلي وفيه حالات بتتدهور فبيدخلوها العزل الصحي بالمستشفيات.. وده نظام متبع في العالم كله وانا حالتي تستدعي الحجر المنزلي حتى الآن الحمد لله".
وتابعت: "الأعراض معايا كحة جافة جدًا نشفان ريق الم شديد في الحلق مع صعوبة في البلع والم بحرقان شديد في منطقة الصدر كأن طوبة على الصدر وهن وضعف شديد والم في الجسم مع صداع ودوخة بسبب عدم وصول الاوكسجين بشكل كافي بسبب صعوبة التنفس مافيش حرارة حرارتي مش بتاخطى ٣٧ ونص وده لان الجسم لسه ما وصلش للمرحلة اللي يتهاجم بشدة من الفايرس فتبدأ الحرارة ترتفع علشان تهاجم الفايرس.. مافيش اي داعي للزُعر ولا نشر الهلع بين الناس ابدااااااااًا ولا فيديوهات صريخ وصويت ولطم كل ده بيخوف ويرعب الناس وبيخلي فيه طاقة سلبية تخلي ناس كتير من الخوف تتوهم المرض وتخلي المناعة تضعف لان العامل النفسي بيرفع المناعة".
وختمت حديثها قائلة: "وزي ما قولت في الفيديو توخوا الحذر واعملوا اللي عليكم ولكن دون فزع أو نشر هلع بين الناس لان الناس فعلًا مش متحملة انشروا طاقة إيجابية وكلموا الناس عن كام حالة اتحولز من ايجابي لسلبي وكان حالة خفت وخرجت من المستشفى وكام حالة عملت حجر منزلي وحالتها كانت بسيطة واتحسنت وهي في بيتها.. انشروا الطاقة الإيجابية ارجوووووووووووكم الناس محتاجينها.. مافيش نهائي اعراض زي العطس أو الرشح معايا.. مافيش حاجة حتى الآن اسمها علاج كورونا الإجراءات المتبعة معايا أدوية تقوية المناعة بفيتامين دي وفيتامين سي واكل الخضار وفواكه تحتوي على فيتامين سي زي البرتقال والكيوي والليمون والموز وشرب سوايل دافية والابتعاد عن المشروبات الباردة ووقف السكريات نهائيًا".
