في برنامج «لسه فاكر» المذاع على شاشة القناة الثانية مع نهال كمال، استضافت الفنانة بوسي، للحديث عن الفيلم الرومانسى «حبيبى دائمًا».
قالت بوسي: «لسه فاكره فيلم حبيبى دائمًا، فيلم عظيم وكان من الأفلام التى جسدت واقع الرومانسية وعمره مايتنسى صعب». وأضافت كنت قدمت فيلم «قطة على نار»، وكان تفكير نور الشريف أن يقدم لى قصة رومانسية، والفيلم قصة حقيقية في الحياة، لكن بعض التفاصيل تم حذفها، ومنها حكاية مرضها، وكان في مشهد تساقط شعر البطلة نتيجة تلقيها العلاج، وتم حذفه لتأثيرها القوى على المشاهد، وفى القصة الحقيقية كانت البطلة لديها أولاد لكن حذفنا هذا أيضًا.
وأضافت: يستوقفنى في فيلم «حبيبى دائمًا» الجمل الناعمة الرومانسية مثل جملة جميلة وعبقرية، وهى أن الحبيبة بتقول لحببها وهى في المستشفى «تخيل الناس افتكرت انى قريبتك عشان فينا شبه من بعض» فرد عليها وقال «معقول أنا حلو ومسمسم كده» فقالت له «الشبه مش تقاطيع وملامح هو روح وإحساس».
وتابعت: في جزء اتصور من الفيلم في مصر وجزء آخر خارجها وفى ذكريات جميلة معه، ذهبنا إلى لندن والجو كان برد جدًا وفى مشهد على مركب واحنا في وسط النهر هناك أنا لابسة شتوى والمركب ماشية كانت سنانى بتخبط في بعضها من الجو البرد، وعلى أكمل وأمثل بحب فيه ومش حاسة بالبرد وأنا أصلا مش قادرة أفتح فمى خالص.
وكان هذا الفيلم في كم كبير جدا من الدموع والبكاء للمشاهد ودائما ببقى حريصة في هذه الأدوار إنى لا أبكى كثيرا ولو الأداء ممكن أعمله بدموع أو من غير أفضل أعمله من غير دموع، لأنى لا أحب الدموع وبحس أنها أكثر وسيلة لتوصيل المشاعر من أنك تمثلى من غير دموع.
وهناك مشاهد صعبة، وأصعب مشهدين لى كأداء وإحساسى أنا فيهم وأنا خارجة من المستشفى بعد ما عرفت إنى عندى المرض الخبيث هذا وطالعة من المستشفى وبطلب تاكسى في لندن.
ومشهد آخر و«أنا قاعدة مستنية حبيبها يجيلها من بره وهو عرف إن عندها المرض خلاص، وهى بتخبى ومش بتبين له أنها عارفة أما كانت في البيت وبتبص من وراء الستارة وشافته وهو جاى هو مشهد صغير جدا لكن جواه مشاعر جامدة». واختتمت: المخرج حسين كمال كان له بصمة في فيلم حبيبى دائما كنت في فترة لسه بكون فيها شخصيتى الفنية.
