قال محمد أشرف، مصور واقعة احتضان أب لابنته أسفل عجلات قطار الإسماعيلية: "الواقعة حاجة تقطع القلب، وفضلت ساعة نص جسمي مشلول"، مضيفًا: "إحنا طلاب في جامعة تجارة وخارجين في آخر يوم امتحان وراكبين قطر القاهرة مستنينه يتحرك سمعنا قطر بضاعة وسمعنا صوت فرامل القطار".
وأوضح "أشرف" في مداخلة هاتفية لفضائية "صدى البلد"، مساء الاثنين: "اللي حصل إن البنت نازلة من القطر بتنط ووالدها وراها ونازلين يعدوا من تحت القطر وهو واقف، فالقطر لما اتحرك عمل صوت رهيب رج المحطة كلها، وسمعنا صريخ جامد ونزلنا من القطر اللي راكبين فيها، بنبص على اللي حصل لقينا الأب واخد البنت في حضنه مفيش 2 سم زي ما ظهر في الفيدي".
وتابع: "الكل كان واقف بيدعي وحالة من الذهول الرهيبة على المتابعين، ولكن من الواضح أن الأب قريب من ربنا لأنه لو قرب مجرد 1 سم كانت لمست الجاكيت بتاع الأب"، مؤكدًا: "قصدت أني أصور وقلت لازم عشان الإهمال يبان".
وأشار: "اللي حصل أن الأب دا خارق لأنه مش طبيعي، وهو كان بيقرأ قرآن وبعد ما القطر عدى طلعت بنته من على الرصيف وقعدت في القطر والأب كان عنده قوة تحمل وبيضحك وبيقول الحمدلله بنتي اتكتبلها عمر جديد والحمدلله ان بنتي قامت".
وأوضح: "أن البنت كانت مصدومة والأب قريب من ربنا أوي عشان كده ربنا كان حليم بيهم"، مشيرًا إلى أن زمايلي قالولي إن الأب وبنته نزلوا في محطة الزقازيق، متابعًا: "الواقعة حصلت في محطة الإسماعيلية بالظبط والحادثة حصلت امبارح الساعة 1 إلا 5 دقائق ظهرًا".
