كلمنا ع الصنعة
يا أسطى ياسين
عن الإيدين الشقيانين
عن لحن ترس المكن
عن الزمن
لما القلوب كانت دفا
زي بيوت الطين
كلمنا عن حبات عرق
كانت تسيل
تلقى الكفوف مناديل
كلمنا ع السريحة
والفريزة
والجميعة
عن فنانين الدرب
والحدادين
عن المغنواتية
والآلاتية
وشدادين الوتر
ومرددين الموال
عن طالبين المدد
عن خطى المريدين
احكيلنا يا عم ياسين
عن ابن بنت النبي
عن سيدنا
الحسين
عن ستنا أم هاشم
عن نصرنا
وانكسارنا
عن ضعفنا
وانبهارنا
عن النبي
اللي جه زارنا
عن آية من القرآن
مكتوبة على جدار ديارنا
ادخلوها بسلام آمنين
ياااه يا أسطى ياسين
رجعت بينا الحنين
احكيلنا بالتنوين
عن نسمة عصاري
وصحبة خطاوي
وكوزين درة
على شط النيل
عن وردية
آخر الليل
عن زهرية ورد
في بلكونة
بتوزع ضحكتها
على حبيبين
عن تواشيح الفجر
عن سبت السوق
عن حبة ملح ويا سميطة
عن حبة حمص
عن قرطاس اللب
عن كوباية حمص شام
عن كرم الضيف
ولو برغيف
عن كره الزيف
عن جدعنة المصريين
عن عامل ترحيلة
عن فلاح على محراته
عن عسكري واقف خدمة
عن كمسري قطر
ما بيرميش البني آدمين
عن سميعة وصيتة
عن صوت الراديو
ساعة الصبح
عن مريلة بني
وشنطة قماش
وكراسة عنوانها الحب
عن لمة عيلة
وقت آدان المغرب
عن توشيحة
عن ترنيمة
عن فرع لزينة
متعلق من قلب لقلب
عن صقفة وزغرودة
ورشة ملح
ودقة هون
عن إفراج العيد
عن مسجون
عنا إحنا يا عم ياسين
إحنا المصريين
احكيلنا كام مرة
جرح إيديك سكين
كام مرة نزفت صوابعك وجع
كام مرة بوست كفوفك
حمد ورضا
وصبرت على عند السنين
احكيلنا من الأولة
لحد ما وقفنا
هنا
يا أسطى ياسين
وعجبي
