أجهش الإعلامى عمرو أديب، بالبكاء على الهواء، تأثرًا بوفاة مخرج البرنامج شريف السقا، قائلًا: "كنت متفق يحطوا صورة شريف في أول البرنامج ومكنتش متخيل هتعمل فيا كده".
وأضاف أديب، خلال تقديمه برنامج "الحكاية"، على فضائية "MBC مصر": "دايما بيعلمونا في الإعلام إن مفيش مذيع يعيط على الهواء ودي حاجة لازم أعملها"، مردفًا: " في الساعة 9 امبارح، جالى تليفون من زميل لينا في أوربت قالى شريف السقا مات، ودا مخرج البرنامج".
وتابع: إحنا بنتنقل من قناة إلى قناة كعيلة، وأنا أعرف شريف السقا في أوربت، من 20 سنة، فيه 2 بيكلمونى في ودانى، المخرج ودا مهم جدًا، معرفش أقعد من غيره"، مردفًا: "شريف كان سايق عربيته على طريق الناصر، كان فيه عربية قمامة بنزينها خلص، ومحبش الرجل يشيلها من مكانها، وسابها في الشمال، ويبدو شريف إنه بيفادى العربية، وميعرفش إن العربية واقفة، ودخل في العربية وتوفى، والعربية فيها 2 أو 3 اتنقلوا للمستشفى".
وتابع: "فجأة الإنسان مبيبقاش موجود، الإنسان اللى أنت متعود تشوفه، شريف كان بعد ما البرنامج يخلص يوصلنى لباب العربية، وكان طيبا وإنسانا بسيطا جدًا، ومخلصا في شغله، ساب بنتين منهم بنت صغيرة".
وتوفى المخرج التليفزيونى شريف السقا، مخرج برنامج "الحكاية" للإعلامى عمرو أديب، كما عمل معه ببرنامج "كل يوم" الذى عرض على شبكة قنوات أون.
شريف السقا هو شقيق الإعلامى مصطفى السقا، وهو المشرف العام على شبكة قنوات "أوربت" السابق، والرئيس السابق لقناة أون.
