بعد إعلان إصابته بالبهاق.. نجوم الفن يدعمون رامى جمال

تابع أحدث الأخبار عبر تطبيق

وبطريقة مؤثرة، دعمته المطربة اللبنانية إليسا حيث أعادت نشر كلامه وعلقت قائلة: "ممنوع تغيب وممنوع يكون البهاق عذر لغيابك. انت بتقول ابتليت بالبهاق، بس مش سبب لتخاف وتغيب. في ناس ابتليت بالكذب والخيانة والسرقة وما هربت. وجودك أساسي ومثل ما انت بتقول: أصل الحكاية مش حكاية "شكل"... حكاية روح".

 

وكتبت الفنانة زينة، قائلة: "إنسان محترم ربنا يعفو عنك... للأسف احنا في دنيا مابترحمش والنَّاس بقت صعبة ياريت نحاول يكون في قلوبنا رحمة... أنت إنسان موهوب يمكن أنا ماتشرفتش بمعرفتك بس قلبي معاك، وأوعى تفكر تتهزم ده مرض عادي، وربنا يعفو عنك وقول الحمد لله والنَّاس الرحيمة كتير واعتبرني من أهلك والإنسان بموهبته واحترامه وأخلاقه وبس"، وقالت الفنانة سوسن بدر: "قدر الله وما شاء فعل الرضا بيشفينا بإذن الله".

وقالت له الفنانة إيمى سالم، "كمل وأعمل اللي بتحبه وإحنا معاك وفي ظهرك".

ووجهت الفنانة لطيفة، رسالة دعم لرامى، قائلة: "حبيب قلبى يا رامى يا مبدع يا محترم يا مختلف، أوعى تفكر كده أول حاجة لازم تقول الحمد لله على كل حاجة، دا مرض حصل لناس كتير وتعالجت منه الحمد لله وبعدين احنا بنحبك على موهبتك وفنك الرائع وكل جمهورك وأنا منهم بنبقى مستنيين جديدك دايما".

وقالت الفنانة عبير صبري في تدوينة لها: "الفنان إنسان طبيعي معرض لكل شيء مرض ابتلاء.. تعب وغيره بعض من الناس اللي مبتفهمش كده وترهقه وتكون عبء زيادة عليه بتعليقاتها السخيفة أو اللي مفيهاش أدب ولياقة ولا فيها رحمة بتخلي فنان يسيب شغله لأنه تعرض لمحنة ممكن أي حد يتعرض لها بسبب الكلام القاسي اللي هتتحاسبوا عليه أدام ربنا.. لأن الدين بيقول الكلمة الطيبة صدقة.. رامي جمال إنت فنان كبير وليك جمهور بيحبك وبينتظرك.. كمل مشوارك وربنا هيشفيك ويعافيك.. بتقبلك لمرضك ومحبة جمهورك ودعواتهم.. إنت أقوى من المرض وكلنا معاك".

وقالت الفنانة إيمان العاصى: "حبيبي يا رامي أنت أقوى من أي حاجة وفنان وموهوب ونجم وكل ده ولا حاجة قصاد نجاحك وحبك لفنك ربنا يقدرك على الناس عديمة الإحساس ربنا يخليلك ناريمان بالدنيا".

وكتب النجم تامر حسنى قائلًا: "إلى الفنان الكبير والصديق الحقيقي والمحترم رامي جمال يا حبيبي أنت فنان كبير ومحبوب وليك قيمتك وكل الناس بتحبك ومفيش حاجة هتعطلك عن نجاحك، وتعبك دا لا هو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر حتى لو كان تعب نفسي أو مادي كل شخص جواه وجع من حاجة معينة.. المهم أننا نبص ونتعلم من اللي ظروفهم أصعب مننا ورغم كدا عندهم صبر وبينجحوا في الاختبار وبيقولوا الحمدلله ومكملين وعندهم إرادة وبينجحوا أكتر من الأول".

وأضاف تامر: "لازم تكمل نجاح يا رامي وشيل أي هلاوس من دماغك واوعى تخبي نفسك اللي بيحبك بيحبك لشخصك وفنك.. صدقني دي حاجة عادية يا رامي والله ملهاش أي تأثير لا عليك ولا على جمهورك بالعكس بقى أنت أكيد شايف الناس كلها طيبين إزاي ونفسهم يفرحوك وبعدين افتكر إن مايكل چاكسون جاله نفس اللي جالك وبقى أسطورة مبتتكررش خااااالص وانت فنان وعارف...أنا واثق إنك مؤمن وبتحمد ربنا وهتقوم وهتكمل وهفكرك قدام كل الناس اللي شايفه كلامي إنك هتنجح أكتر وأكتر وربنا هيكرمك أجمل كرم وهتشوف قريب.. بحبك يا رامي".

وتمنى الفنان حمدى الميرغنى، الشفاء العاجل لرامى، قائلا: ربنا يشفيك يارامي ده مش حاجه اصلًا ده الصداع أصعب منه ياخويا الناس كلها بتحبك ️..وكل ماتشوفني أحمد ربنا وأعرف أنك في نعمة"،

أما الفنان عمر السعيد، قال له:" بحبك زى ما أنت ".

وكتب الشاعر أمير طعيمة: "هو أنا معترض على حاجات كتير في البوست ده لاني بقابلك وشايف انك بتحلو وزي القمر ومش بتوقف خالص عند موضوع البهاق ده، واذا كان لفت نظر حد اول مرة ففي المرة التانية محدش بياخد باله اصلا..بس الاهم من ده كله يا رامي انك فنان وبتحترم جمهورك كملحن وكمطرب، يعني مش عارضة أزياء عشان تفكر في الاعتزال والكلام الفاضي ده.. كبر دماغك يا صاحبي، انت أكبر واهم عندنا كلنا من ده بكتير".

وتضامن الفنان أحمد وفيق معه وعلق قائلًا: "رامي جمال أخويا الصغير الطيب ابن البيت الطيب.. بحبك في أي شكل وموهبتك تظل موهبة لامعة برضه في أي شكل.. موهبتك هي الأساس وما حولها هوامش.. أخي رامي أنا في انتظار إبداع جديد فلا تخذلني ولا تخذل من أحبوك وصنعوا اسمك.. بحبك يا أخويا".

وفاجأ المطرب رامي جمال متابعيه على موقع "إنستجرام"، بإعلانه منذ عدة ساعات، إصابته بمرض البهاق، وذلك بعد ظهور بقع بيضاء اللون بمناطق بجسده، دون أن يجد له علاجا.

وقرر رامي جمال أن يشارك الجمهور الأمر ليضع حلين أمامه إما الاعتزال أو أن يتقبله الجمهور بهذا الشكل.

وقال رامي: "الحمد لله الذى أحبنى فابتلاني وقدرنى على الصبر.. من فترة ظهرت بقع بيضا في جسمى وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة".