ترتبط منطقة السيدة زينب، بصناعة حلاوة المولد، واشتهرت باحتوائها على كل ما تشتهى الأنفس في هذه المناسبة، فهناك تجد سمسمية وفولية الفقير والبندق والكاجو للطبقة الراقية، كما يمكنك شراء عروسة المولد المحببة لقلب طفلك سواء المصنعة من الحلوى أو البلاستيك، ورغم كونها عادة لا تتكرر إلا مرة في العام، إلا أنها اختلفت كثيرًا عن الماضى من حيث الأسعار والمنتجات على حد سواء.
وعن هذا الموسم، يقول الحاج «عصام السورس»، ٥٥ عامًا، إنه قضى عقودا من الزمن في هذه المهنة، شهد فيها العديد من التغيرات، وسمع عنها الكثير من الشائعات التى لا محل لها من الصحة، وعن الأسعار يقول: كيلو الحلاوة ٢٥ جنيها هذا العام ويصل إلى ٧٥جنيها، حسب النوع لكن عن الجودة الكل واحد.
ويضيف: زمان من ٤٤ سنة، كانت حلاوة المولد ببلاش، وكان سعر العلبة بيدأ من ١٠ صاغ لحد ربع جنيه، ودى كانت علبة فيها أغلى الأنواع، وحلاوة الفقير هى حلاوة الغني، بتفرق بس في الملبن والفسدق واللوز.
ويستكمل حديثة: « في مجالى شوفت شائعات ياما، ناس بتقول الحلاوة حرام، حرام إزى والشيوخ والناس كلها بتشتري، وناس تانية تقولك الشوادر مش مضمونة، برغم أن الحلاوة عندنا مش للفقير فقط، وأغلب التجار يشترون مننا بسعر الجملة ويعرضونها في محلاتهم بضعف الثمن، وأحب أطمن الناس، الدنيا لسه بخير، مفيش حلاوة مولد صينى في السوق، وعمر ما كان فيه مواد للتحلية غير السكر ولا مواد لاصقة غير العسل، يعنى ولا في جيلاتين ولا ضوافر حيوانات ولا غيره، واحنا بنصنع الحلاوة في مصنعنا يعنى مضمونة، والفرق بينا وبين المحلات الكبيرة الغلاف والاسم.
