مُنحنية
يا كل شوارع منطقتى
رصفانك بتضيق..
على صدر الشارع
لما ضلوعى؛ ضلوعى تخش ف بعض
وكأنى بشوفه لأول مرة
بينزف ناس
وإزاز بيقطع
أوتار أحلامه
يا شارع حافظ لون مريلتى
لون برَّايتى
وبنطلونات العيد، وفانوس رمضان
لون عينى الشمس حبيبتى أم ضفيرتين
طب فينك فين؟؟
ليه سبت الحلم يبهوَّق منى
ويصبح ميادين
ليه فجـجت حيطان القلعة بتاعتى
ليه جنّدت اليأس
ينخوَّر عضم سفينتى
أم شراع بروحين
مَحنية
يا كل شوارع منطقتي
ومكونتش شايف نهاياتك
لما كنت باشوف الأتوبيس
متكربس بالأحلام
كنت بضحك
أنا لما أكبر
ح شترى أتوبيس مخصوص
وح ركِّب كل أصحابى واقعدهم
وكبرت
وكبرت
وزادت الانحناءات
وكبرت
وضاقت بنطلونات العيد
زى ما ضاق الشارع
زى ما ضاعت كل شموسى ومضحكتش
أنا لما يجينى فلوس
ح اشترى قميصين
وحزام مع بنطلونين
بس يا عالـِم
راح اقعد كل أصحابى ف جيبى
ولا ح اقعـّدهم فين..؟
