قالت سامحونى
مش ح اطلب له الرحمة
ولا ح احدف من عينى سلاسل فضة
تترص فـ صناديق
في مغارة (على بابا)
وهأقول:
إن شالله تموتي
إن شالله تغورى فـ داهية (يا مرجانة)
قفطانه الأبيض يوم الجمعة
والسبحة اللى بترعبنى تملى
قبل ما عينى تروح فـ النوم
إيه اللى منور ع الحيطة؟
دلوقتى أنا ح أقدر أشغل أى قناة
مزيكا.. ميولدى، أو حتى دريم
وأسيب (الشعراوى) لوحده على الأولى
أنا ممكن أفتح
شيش وإزاز
وستارة أوضتى الصبح
وأبص على ابن جيرانا النايم
وأدخل في مقارنة
ما بين تفاصيلى وتفاصيله
أنا ممكن أعمل
من كل ضوافر إيدى مظلات
حمرا وزرقا وصفرا
لعشر شياطين نايمين في الطل
أنا ممكن أروح له وأقول له
كان نفسى اطلع سبـَّاحة
رغم إنك
كنت بتلعن (علواني) أبو (رانيا)
إزاى سايب بنته فـ وسط الناس عريانة؟
أنا ممكن أروح له وأقول له
عملِت لك إيه
كراسة رسمى وألوانى بتوع الثانوى؟
علشان ترميهم
م الدور السابع
وتقول لى: الرسم خطيئة كبيرة
أنا ممكن أروح له وأقول له وأقول له وأقول له..
نسيت
طب ممكن ترجع تانى
ح اكوى لك قفطانك
وأقعد قدام الشيخ (الشعراوى)
وفـ آخر الحلقة
أطلب له الرحمة
واقرأ لكوا أنتوا الاتنين الفاتحة