تابع أحدث الأخبار
عبر تطبيق
«١»
لما الكلام ينسلخ من جلده
وينزل الملعب
يرقّص الحواديت
أمنا الغولة واقفة جون
تصدّ عيالها
حاولوا يعدّوا البر التانى
نطت لفوق
أبو رجل مسلوخة واقف زنهار
الشاطر حسن يحدف لعلاء الدين
المصباح يتكسر
تهرب كل الأمنيات
تشق بطن الملعب
تطير جوا الأدمغة
تصحّى سنو وايت
تاخد الأمير لبيت سندريلا
الأقزام السبعة يلفوا نحو الأميرة ياسمين
ياخدوا سيلفى يبعتوه لابوها
الحكم يرفع الراية
تسلل ع العمر اللى فات
يترص البنى آدمين على خط حياتهم
واللى يعدى
يلاقى أبو رجل مسلوخة
في البر التانى
مع أمنا الغولة بيغيروا جلدهم
ويلبسوا سوبرمان
«٢»
إيدك ممكن تخونك
وتبعترك ع الرصيف
أو تسيب عينيك لما الوهم يعشش فيها
أو ممكن ترسملك حفرة
فتقع من غير صوت
لما حاولت تقنعها أنها إيدك
وإنه من واجبها تحميك
رسمت لنفسها شارع
واستخبت ورا عربياته
ولما عرفت إنك شوفتها
نطت ف أول حفرة وهى بتحضنك.
«٣»
سِيرك
اعترف
انك... غلط
ودنيتك
المنصوبة جوا حدود عينيك
سيرك
من غير جمهور
البلياتشو
شاخ
من كتر التلوين
وقّعت
حيطان وشه
فاتهدت الخيمة... عليه
«٤»
الـ اااااه
تحميل م الوجع
طلق مسافر
..... قشاش
يطلع عيل
رجليه
شرق وغرب
بـ مليون وش
النرس
تخبط على ضهره
ينزّل وهم
بيحلم يتشكل
في يوم
.... إنسان