بحبك بعبَلِك
وزحمة شوارعك
ونِيلك
تُرابك
وشعبطة الترام
وقاعدة ليلاتى
على قهوة بلدى
وتسمع كلام
من اللى تحبه
من المعَلِم حمام
وعفرة سحابة
من شيشة طالعة
وزعّقة لمنعم
من عبدالجليل
لقرصُة ف زهرة
ونَدهَ لـ «ولعة»
وعندك تلاتة.. سُكر زياده
وواحدة بحليب
لأحلى شباب
ولّما تجوع
تطلع أوام
على عم عبده
بتاع السمين
وتطلب عكاوى
ولحمة راس
بحبك بعبَلِك
ولما تقّفِل
تاخد ف وشك
وتطلع أوام
تبحلّق ف نيلْها
وتاكل ف ترمس
تأزأز وترمى
وتنسى أوام
بحبك بعَبَلِك
وبعشق غيطانك
وبعشق خَضارها
ونخله ف غيطنا
توحد خالقها
تتابع ولادك
من جد جدى
لحد أبويا
ومن بعدى والدى
بحبك بعَبَلِك
قصيدة لـ« على الحلاوني»
