علق الدكتور طارق شوقي، وزير التربية والتعليم، والتعليم الفني على عدم نشر نتائج طلاب الصف الأول الثانوي بالأرقام.
وقال " شوقي"، إن تفسيرها لن يكون واضحا لدى معظم المواطنين، مستطردًا: "واحد يقول والله ابني كان شاطر لحد 3 إعدادي وبيجيب على طول 95%، ولو هو درجته ظهرت وجاب أقل من ده يبقى خطأ من الوزارة وليس خطأ من الطالب".
وأردف "وزير التعليم"، أن الطلاب تعودوا أن يكون لديهم أسئلة الامتحان قبل الدخول إليه، رغم أن الامتحان يعتمد في الأول والآخر على المفاجأة.
واستطرد " شوقي"، قائلا خلال مداخلة هاتفية في برنامج "الحكاية"، الذي يُعرض على شاشة "MBC مصر"، مع الإعلامي عمرو أديب: "هنعمل زي الدنيا كلها ما بتعمل، إحنا مش هنلوم الصف الأول الثانوي على الحفظ بس هنحاول تغيير النظام بتاعهم، يعني مثلا لما أقول أن متوسط الدفعة في مادة الأحياء حصل الطلاب على أربع درجات فقط من 20 ونيجي نقول للطالب إنت أخذت 6 من 20 بس ناجح فيه ناس كتير مش هتفهم ده"، موضحًا أنه سيعتبر المرحلة الأولى للثانوية العامة شبه علاجية وشبه انتقالية من أجل أن يجعل الطلاب يستفيدون.
واختتم "طارق شوقي": "مش هنسقط العيال عشان جابوا في الأحياء أقل من 10 من 20، مش عاوزين نعاقبهم على ذنب لم يقترفوه، وبعدين لما 200 ألف طالب في الثانوية العامة يجيبوا درجات فوق الـ95%، ده بيعلي تنسيق الطب وبيعلي تنسيق الهندسة، بس لو الأول على الدفعة جايب 85% يبقى هيدخل طب وهو جايب 85%، وكذلك الهندسة اللي هيجيب 75% هيدخل هندسة لو الأول على الدفعة جاب 75% علمي علوم".
