نعت النجمة رانيا فريد شوقي، الفنان الراحل عزت أبوعوف، الذي وافته المنية صباح اليوم الاثنين، بعد صراع مع المرض.
ونشرت "شوقي"، على صفحتها بموقع التواصل الاجتماعي "فيس بوك"، تدوينة طويلة بكلمات مؤثرة قالت فيها: "دكتور عزت أبو عوف فعلا، الإنسان سيرة، كان نفسي تشوف وتحس بكم حب الناس ليك، وسيرتك الحلوة اللي طالعة من قلب، كل إنسان قابلك أو تعامل معك أو حتى أخذ صورة معاك أو معجب بفنك كلهم بيتكلموا على طيبتك وأخلاقك ومعاملتك الذوق المحترمة للصغير قبل الكبير وبشاشة وجهك المبتسم طول الوقت حتي في لحظات مرضك".
وأضافت: "سبحان الله طاقة الحب والخير والنقاء اللي جواك مخزون لا ينتهي ظاهر بشكل واضح سحر غريب تدخل القلب في ثانية من غير مجهود مجرد ابتسامتك وضحكتك اللي من القلب وبتوصل للقلب والطيبة اللي في عيونك مالهاش مثيل أنت رمز للإنسانية افتقدناه لكن هتظل قدوة للطيبة والمحبة الخالية من أي مصالح".
وتابعت: "ياه دايما في ذاكرتي بضحكتك الحلوة الطبيعية وترحابك الدافئ الحنون وطلتك المبهجة دايما لا عمرك زعلت من حد ولا زعلت حد.. التواضع والتلقائية والبساطة طبع أصيل فيك حتى وأنا بكتب دلوقتي عن وفاتك شايفة وشك البشوش الضاحك اللي زيك مايتنسيش إنسانيا وفنيا ليك علاماتك وتأثيرك الساحر في قلوب محبينك وكل من أسعده الحظ وقابلك ولو ثواني الله يرحمك ويغفر لك ويجعل مثواك الجنة كل يوم هقرأ لك الفاتحة وادعيلك زي مابعمل لبابا ياه كل الناس الحلوة اتجمعوا مع بعض عند رب كريم".
