كان يتردد عليه مئات الأهالى يوميا، يشترون منه الخبز، يوفر عليهم الكثير من التعب، ولكن تم غلقه لأسباب غير معلومة، مخبز شارع التحرير بمنطقة الدقى، الذى يعمل بنظام البطاقة التموينية.
«عم جمال» أحد سكان شارع سليمان جوهر، وأحد المتضررين يقول: «إحنا هنا فى شارع سليمان جوهر مئات من الأسر، كل يوم كنا بنتردد على المخبز فى شارع التحرير فى الدقى، وطبعا كان المخبز بيسد احتياجات ناس كتير، من سكان الدقى، يعنى عندك كل شارع التحرير ومنطقة أولاد علام، بالإضافة لشارع سليمان جوهر، كان اعتمادنا الرئيسى على المخبز الموجود فى شارع التحرير، لكن للأسف تم غلقه، إحنا كل ما نحتاجه فتح المخبز مرة تانية توفيرٍا للجهد على الأهالى، لأنه هو المخبز الوحيد اللى بيشتغل على نظام البطاقة التموينية بجانب مخبز فى منطقة داير الناحية».
«كمال» 60 عاما، أحد السكان الذين يعانون من البحث على مخبز بالبطاقة التمونية، يقول لـ صوت الناس: «المخبز كان بيحل مشكلة كبيرة قبل ما يتم غلقه، دلوقتى تم استبداله بكشك فى ممر فى عمارة 108 فى شارع التحرير، بس للأسف العيش لحد ما يوصل من المخبز اللى بيجبوا منه بيكون صعب إنه يتاكل طبعا دخل فى بعضه، واتعجن، فطبيعى ميبقاش صالح للأكل، إحنا كل ما نطالب بيه فتح المخبز بشكل يومى، لأنه قبل كده اتفتح فترة وتم غلقه ودى مناشدتنا للمسئولين».
