أحبت مجال الموضة والأزياء منذ صغرها، فكانت تقوم بخياطة الملابس لعرائسها، وعندما تشاهد رسومات للملابس تحاول رسمها وتطبيقها على أرض الواقع.
وئام أحمد أبو نجم «٢٥ سنة»، من أبناء محافظة دمياط، درست فى قسم الملابس والنسيج بكلية الاقتصاد المنزلى جامعة الأزهر، وقررت دخول عالم الأزياء والموضة ومن هنا بدأت مشروعها.
تقول: «بعد تخرجى اشتغلت فى مصنع ملابس كاچوال حريمى ومصنع ملابس أطفال، خدت منهم خبرة كويسة، بس كان نفسى أعمل حاجة لنفسي، فاشتغلت فى التدريب، وكنت بعمل كورسات تفصيل وخياطة فى مراكز مختلفة، وفى نفس الوقت كنت بعمل شغل خاص بيا، بنفذه من البيت وأشارك بيه فى معارض».
وعن بداية مشروعها تقول «بعد تعلمى الكثير فى هذا المجال احترفت التصميم، وبدأت أصمم لنفسى ولمن يطلب منى من أصدقائى وأقاربي، وحبيت شغلي، وبقى ليا بصمة مميزة فى تصميماتي، وقررت أنى أفتح مكان خاص بيا يكون أتيليه، وفى نفس الوقت مركز تعليمى متخصص فى مجال الملابس».
وقالت مستكملة «بدأت أرسم التصاميم وأنفذها على أرض الواقع، ثم أقوم بخياطة بعض القطع الصغيرة، واتعلمت التطريز والتزيين لأنى بحب أشتغل كل حاجة فى القطعة بإيديه، علشان يكون التصميم متميز، وكنت بتابع الأزياء المحلية والعالمية علشان أشوف آخر صيحات الموضة».
وعن تشجيع أهلها وأصدقائها تقول «حصلت على تشجيع كبير من أهلى وأصدقائى المحيطين، وبحلم أفتح أكاديمية معتمدة متخصصة فى مجال الملابس، ومبنية على منهج احترافى، أتوسع فى مجالى وشغلى يكون براند له طابع مميز».
