أيام قليلة تفصلنا عن شهر رمضان الكريم، وبدأت الشوارع تتزين بشوادر بيع الفوانيس والزينة، خاصة فى المناطق الشعبية التى لها طابعها الخاص فى استقبال تلك المناسبة، حيث يصطحب الآباء زوجاتهم وأبناءهم كل عام لاختيار فانوس رمضان الذى تنجذب إليه عيونهم، ويخطف بجماله قلوبهم، كما يستعد الشباب والفتيات لشراء «بوكس» رمضان، والذى يعد آخر صيحات الموضة الخاصة بتلك المناسبة، وهو عبارة عن صندوق مضيء، بداخله دمية لـ«بوجى أو طمطم» وتيشيرت رمضان، والزينة المصنوعة من الأقمشة.
يقول مصطفى شديد، أحد بائعى الفوانيس فى منطقة عزبة النخل، إن الإقبال جيد هذا الموسم، ويستيقظ الشاب النشيط صباح كل يوم، متوجهًا إلى «شادر» الفوانيس الخاص به ليبدأ عمله منذ العاشرة صباحًا وحتى الساعة ١٢ مساءً، مشيرًا إلى أنه تفاجأ بجاره جرجس الذى جاء إليه فى اليوم الأول ليهنئه بحلول شهر رمضان، ويشترى فانوسًا لنجله مينا.
ويتابع: «اتعودنا نفرش قبل رمضان بشهر، وهنا عشان عزبة النخل فيها كنيستان، وعندنا أقباط كتير، بييجوا يشتروا من عندى فوانيس لأولادهم، كلهم أصحابنا وحبايبنا، وأول ناس بيدفعوا فى فلوس زينة ولمبات رمضان اللى بتتعلق فى الشوارع، والسنة دى أسعار الفوانيس بتتراوح ما بين ٦٠ و٣٥٠ج وبوكسات بوجى وطمطم هما أحدث صيحات الهدايا».
ويقول: الهلال الخشبى اللى بينور ويغنى أكتر حاجة عليها إقبال لحد دلوقتي، والسنة دى اخترعنا تيشيرتات رمضان، ودى بتبقى على الشكل الخيامى الجميل، وبتمنى رمضان اللى جاى أعمل فانوس الهرم الرابع وأحطه بجانب أهرامات الجيزة وندخل بيه موسوعة جينيس كأكبر فانوس فى العالم لجذب السياحة، وهيتكون من أحجار مضيئة ونحط داخله لمبات والفانوس هيكون تحت إشراف وزارة الآثار بحيث ننوره طول شهر رمضان من كل عام ونطفيه فى باقى شهور السنة».
