يطالب سكان حى الدقى بمحافظة الجيزة، بإعادة فتح المخبز الذى يتردد عليه يوميا المئات من الأهالى.
ويقول جمال رزيق، أحد السكان: «المخبز دا بيغطى منطقة كبيرة فى الدقى وأهمها شارع سليمان جوهر اللى فيه سكان بالمئات، ومنطقة أولاد علام، بالإضافة لسكان شارع التحرير من أوله لآخره من أول شيراتون القاهرة وقطاع القوات المسلحة من أول كوبرى الجلاء لحد شارع السودان، دى كتلة سكنية مهمة جدًا، وسكان شارع المساحة بييجوا فيه هو المخبز الوحيد اللى شغال على البطاقة التموينية جنب مخبز داير الناحية، وطبعا عشان نروح داير الناحية بيحصل مضايقات لأننا أغراب عن المنطقة، وكمان المخبز هناك بالعافية بيكفى السكان فى المنطقة، قدمنا شكوى لجهات كتير، ونحن نناشد النائب عبدالرحيم بالتدخل، لأنه بيتواصل معانا دايما، عايزين مشكلتنا بس توصلوها عن طريق الجورنال للهيئة العامة لمخابز القاهرة الكبرى قطاع غرب القاهرة، لأن فيه ناس هنا مش قادرة تشترى الرغيف أبو جنيه، أو نص جنيه لضيق المعيشة».
ويتابع «عم كمال»: «بيجيبوا كل يوم عيش فى الكشك التابع للمخبز فى ممر بجوار عمارة ١٠٨ فى شارع التحرير، بس لحد ما يوصل بيكون غير صالح للأكل، والعيش متعجن، وفوق بعض، فطبيعى إننا منشتريهوش ويرجع كتير منه زى ما هو، فالأزمة بس إننا عايزين يرجعوا الفرن تانى يشتغل».
ويختتم الأهالى حديثهم بأنهم يناشدون المسئولين بحل المشكلة عاجلًا، والنظر فيها وليس فتح المخبز يومان ثم غلقه مرة أخرى كما حدث خلال الفترات السابقة.
