كشف باسم مرسي، مهاجم نادي الزمالك، تفاصيل فسخ تعاقده مع سموحة، خلال الفترة الحالية بعد الانضمام له منذ ساعات.
وقال "باسم" عبر حسابه الرسمي "تويتر": "تلقيت اليوم اتصالا من مسئول في نادي الزمالك يطالبني بالرجوع، قالي بالنص: عندي ليك مفاجأة، الزمالك عايزك ترجع وتروح نادي تاني بدل سموحة.. احنا اللي أخرنا البطاقة الدولية عشان لو كنت لعبت الماتش مكناش هنعرف نرجعك".
وتابع: "بسبب موضوع معين بقيت أنا طرف فيه بدون ارادتي، دلوقتى قدامى اختيار من اتنين الأول إنى ألعب في الزمالك والمدرب مش عايزنى، أما إني انتقل لفريق ترتيبه الأخير في الدوري.. هل أنا بعد ما لعبت أربع مواسم في الزمالك، حصلنا فيهم على ٥ بطولات وأحرزت ٥٣ جول ده يكون مصيري من مسئولي نادى الزمالك؟".
وأوضح: "قبل كده انا مكنتش بطلع اتكلم، بس الموضوع يوصل إن يتقال إن التأخير بسببى فى موضوع البطاقة الدولية وتشويه سمعتى إن ده بسبب خلاف مادى بينى وبين النادى اليونانى ده مش صحيح.. انا عقدى اتفسخ رسمى من الاتحاد اليونانى، لو مكنش اتفسخ رسمى مكنش يحقلى إني أتمرن مع نادى سموحة.. أنا فى وقت إقامتى كاملة في اليونان، حصلت على ٥ آلاف يورو فقط واتنازلت عن جميع مستحقاتى للزمالك وجددت سنتين اتنازلت فيهم عن ٤ ملايين جنيه عشان يوافقوا على احترافى".
وأكمل: "عند انتقالى إعارة لسموحة جددت سنة كمان على بياض للزمالك.. انا هرجع نادى الزمالك مش لو بألف جنيه لو ببلاش لأن شرف ليا إنى العب في نادي الزمالك".
واختتم: "مكنتش حابب انى اتكلم رغم اتصال عدة برامج بيا من وقت وصولى للقاهرة لتوضيح عدة أمور بمقابل مادى بس انا كنت برفض.. انا حاليًا بعد ما استقريت فى الاسكندرية ونقلت أسرتى وأغراضى واستأجرت محل سكن، تم إبلاغي انى لازم إلغى كل ده وارجع حالًا يا أقعد ست شهور ف البيت.. يارب الناس اللي كانت بتتهمنى إنى مقصر طول الوقت وبعمل مشاكل تكون الصورة واضحة لهم، انا طول الوقت بتحط ف مشاكل انا مش سبب فيها، اسف على التطويل بس كان لازم التوضيح".
