جدد أهالى شارع إسماعيل الحبروشى بميت عقبة مناشدتهم المسئولين لإزالة الأشجار الشائخة فى الشارع، والتى يتوقعون سقوطها فى أى وقت وتودى بحياتهم ويطلبون من مسئولى الحى إنقاذهم من هذا الخطر الذى يتهددهم كل لحظة أثناء خروجهم للعمل أو الوقوف بالشارع، إضافة إلى القلق الذى يلازمهم على أطفالهم.
يقول عم عبدالعزيز ٥٠ عاما وأحد سكان الشارع: «الشجرة لو وقعت علينا هتموتنا، وقدمنا بلاغًا أكثر من مرة، ومحدش سائل فينا، بقينا بنخاف نقرب منها غير أن الفروع بتاعتها كل فترة بتقع منها، وأكثر من مرة فى ناس كانت هتموت بسببها، ومن سنة وقع فرع علينا وأتلف عربيات الناس، واحنا مش عارفين نعمل إيه.
وأضاف: «أنا بواب وأوضتى متعرشة بالخشب ومفيش سقف يحمينا، وعايشين تحت الشجرة لو وقعت فى أى لحظة هتموتنى أنا وعيالي، ولا عشان إحنا غلابة محدش مهتم بينا، والحى كان هنا بيقطع شجرة تانى عشان فى ماسورة ميه كانت مكسورة تحتها، ولما طلبت منهم أنهم يقطعوا التانية عشان دى خطر علينا وعلى الأهالى قالوا: «لما تقع هنيجى ونشيلها» لو وقعت وحدها هتتسبب فى موت حد، أو إتلاف أى شىء تحتها وأولهم أوضتى أنا وعيالى، وطول الوقت أنا بخاف على عيالى يطلعوا يقع عليهم فرع أو يصيبهم أذى منها وأنا أناشد المسئولين من أجل هذه الكارثة التى ستتسبب فى أذى الكثير من الأهالى بالشارع».
