يعانى سكان شارع حجاج بأرض اللواء بمحافظة الجيزة، من الانقطاع المستمر للمياه، والتى تعود فى أوقات متأخرة بالليل لمدة ساعة واحدة فقط، مما يشكل عائقا كبيرا على تلبية احتياجاتهم.
يقول «أبوماجد»، البالغ من العمر ٥٤ عاما، أحد سكان المنطقة: «ما فيش حياة من غير ميه، وربنا قال فى كتابه «وجعلنا من الماء كل شىء حى» وإحنا بالشكل ده أموات لما تبقى الميه بتجيلنا ساعة واحدة فى اليوم فى نص الليل يا نلحقها يا منلحقهاش تبقى دى حياة طبيعية إزاى».
وتضيف «أم نانسى»، البالغة من العمر ٣٧ عاما، «إحنا بنطالب بأبسط حقوقنا كمصريين، وإن الميه تتوفر فى بيوتنا، ليه نفضل عايشين فى العذاب ده كله، والموضوع ممكن يتحل بسهولة، لو حد من المسئولين اهتم بينا».
وتتابع سهام محمد، البالغة من العمر ٦٦ عاما: «أنا بيتى صغير وعلى قدى، والأدوات إلى بملأ فيها الميه كتير، وساعات بنخبط فيها وإحنا رايحين وجايين، والميه بتقع على الأرض فى البيت ومش أنا بس إلى بعانى من كدة، كل المنطقة شققها صغيرة، ليه العذاب ده وهى مشكلة ممكن تتحل فى يوم».
واختتم الأهالى بمطالبة المسئولين بالنظر فى أمرهم للتخلص من هذا المأزق الكبير الذى جعل حياتهم عذاب، خصيصا حينما لا يستيقظون بوقت مجيء المياه ليلا، مما تضيع فرصة تأدية أغراضهم فى ذلك اليوم».
