ترتبط منطقة «باب البحر» بالقاهرة، بصناعة حلاوة المولد، واشتهرت باحتوائها على كل ما تشتهى الأنفس في هذه المناسبة، فهناك تجد «فولية» الفقير و«فستق» الطبقة الراقية، كما يمكنك شراء عروسة المولد المحببة لقلب طفلك سواء المصنعة من الحلوى أو البلاستيك، ورغم كونها عادة لا تتكرر إلا مرة فى العام، إلا أنها اختلفت كثيرًا عن الماضي من حيث الأسعار والمنتجات على حد سواء.
وعن هذا الموسم، يقول الحاج حسن، البالغ من العمر 57 عامًا، إنه قضى 4 عقود من الزمن فى هذه المهنة، شهد فيها العديد من التغيرات، وسمع عنها الكثير من الشائعات التى لا محل لها من الصحة، ويبدأ سعر كيلو «الحلاوة» هذا العام من 30 ج ويصل لـ100 ج، حسب النوع والجودة.
ويتابع: زمان من 40 سنة، كانت حلاوة المولد ببلاش، وكان سعر العلبة بيبدأ من 15 صاغ لحد ربع جنيه، ودي كانت علبة فيها أغلى الأصناف، وحلاوة الفقير هي حلاوة الغني، بتفرق بس في الملبن والفستق واللوز».
ويضيف: «في مجالي دا شوفت شائعات ياما، ناس بتقول الحلاوة حرام، حرام إزاي والشيخ عبدالباسط عبدالصمد كان بييجي يشتري من عندنا، وناس تانية تقولك الشوادر مش مضمونة، طب إيه رأيكم إن عادل إمام كان بيبعت السواق بتاعه يشتري مننا عروسة المولد وحصان مصنوع من الحلاوة، غير أن أغلب التجار ييجوا يشتروا مننا بسعر الجملة ويعرضوها في السوبر ماركت بضعف الثمن، وأحب أطمن الناس، الدنيا لسه بخير، مفيش حلاوة مولد صيني السنة دي، وعمر ما كان فيه مواد للتحلية غير السكر ولا مواد لاصقة غير العسل، يعني ولا في جيلاتين ولا ضوافر حيوانات ولا غيره».
