أكد المخرج أحمد عاطف الذي قام بإخراج مسلسل "ستات قادرة" الذي شاركت في بطولته الفنانة الراحلة هياتم أنها كانت من أهم أسباب نجاح هذا المسلسل، وقال: "هياتم كان لسانها نضيف ولا يمكن تشوفها بتشتم مخلوق "، وقال في تدوينة عبر صفحته بموقع التواصل الاجتماعي "فيس بوك": "الله يرحم الفنانة الكبيرة هياتم. كانت صديقة واخت عزيزة. وكانت من اهم اسباب نجاح مسلسلنا ستات قادرة. من أجمل الناس اللي اشتغلت معاهم في الوسط الفني. فهمها للدراما مذهل. وعارفة كويس قوي مستويات النص. ومؤمنة بالبعد الاجتماعي للعمل وايه اللي بيطرحه وليه بيطرحه بالطريقة اللي اختارها المخرج والكتاب."
وتابع قائلًا: "أما عن الالتزام فحكاية. تضبط عليها ساعتك. دايما تيجي في معادها وقبل معادها كمان بساعة علي الاقل حتي لو التصوير في اخر الدنيا. هي اللي بتعمل لنفسها شعرها وماكياجها. حافظة المشهد بالحرف بما فيه كلام زملاؤها. بسبب الخبرة الطويلة والاخلاق العالية، وفمهمها لتعب المخرج وفريق العمل في المسلسل، لا يمكن يصدر عنها أي تصرف غير مقدر لجهدهم. دايما بتساعد الممثلين اللي قدامها لو مرتبكين او متوترين او مش حافظين. واحسن حد تلاقيه مقدر الظروف الإنتاجية.
واشار الى انها كانت تقبل تقعد في غرفة ممثلين مع زميلة اصغر منها ولا تبحث عن الرفاهية في اللوكيشان. ومعاهاش غير المساعدة بتاعتها مش جارة جرمق وراها مالهمش اي تلاتين لازمة. وتعمل اي مشهد مطلوب منها حتي لو اكشن. وتقع علي الارض وتتدألج وهدومها تتغرق بالدم الصناعي وتنفذ اي حاجة عايزها المخرج. لو عندها ملاحظة في اي شيئ. تستني وقت انت فاضي فيه في البريك مثلا وتيجي تقولها بكل ذوق واحترام حريصة علي عدم تجاوز حدودها وبكل احترام لدورك كمخرج. وطبعا روحها حلوة وبنت نكتة وتعطي الفضل لاصحابه وتشكرك علي شغلك وادراتك الفنية للعمل. وكانت فخورة بنجاحها في المسلسل رغم تاريخعا الطويل. وتحكيلي الناس بيقولولها ايه عن دورها وعن المسلسل كله،مش زي ناس تانية المسلسل علاهم مع الجمهور وما شفناش منهم اي كلمة خير."
وأنهى التدوينة قائلًا: "هياتم كانت لسانها نضيف ولا يمكن تشوفها بتشتم مخلوق حتي اللي مضايقة منهم. ست زي البرلنت فعلا وممثلة جبارة وانسانة محترمة. ربنا يرحمك علي قد محبتك لخلق الله".
