اتجه بخطوات ثابتة نحو النجاح، عرفه الجمهور من المسرح، إلا أنه أثبت حضورا أيضا على شاشات السينما والتليفزيون، تألق مع عدد كبير من نجوم الشاشة حتى وصل حاليا إلى دور البطولة المطلقة فى مسلسله الكوميدى الجديد «ربع رومى»، الذى يخوض به المنافسة فى رمضان المقبل على شاشة قناة «أون تى فى»، هو الفنان مصطفى خاطر، الذى تحدث «البوابة»، عن مشواره الفنى، وأعماله المقبلة، وكشف لنا الصعوبات، التى واجهته فى بداية مشواره الفنى.
ريم حمادة
الزعيم أيقونة الكوميديا.. وسعيد بعملى مع أمير كرارة.. و«مسرح مصر» أعاد الجمهور للمسارح
مسلسل «نيللى وشيريهان» ساهم فى نجاحى
و«هربانة منها» نقلة نوعية فى مسيرتى الفنية
براءة ريا وسكينة.. المحاولة الفنية الأولى لتقديم التاريخ كما يجب
■ احكِ لنا عن كواليس التصوير فى فيلم «حرب كرموز»؟
- انتهيت من ٩٠٪ من تصوير مشاهدى فى فيلم حرب كرموز، واستمتعت بكواليس العمل مع كل فريق الفيلم، خاصة أمير كرارة، وسعيد بأنى عملت معه فى أول فيلم له، وأتمنى أن يحوز الفيلم إعجاب الجمهور، وربنا يكرمنا فيه.
■ كيف ترى الإيرادات التى حققها فيلمك الأخير «طلق صناعى»؟
- طلق صناعى حقق إيرادات جيدة جدا، واستمر تصدره لفترة طويلة على أفلام حتى كانت مطروحة قبله، فالفيلم نجح جماهيريا، ولكن لأن طرح أى عمل خلال موسم الشتاء والامتحانات، بالتأكيد يكون الإقبال مش قوى زى موسم الصيف والأعياد، وأعتبر أن ما حصل عليه الفيلم من إيرادات كرم من عند ربنا، بالإضافة إلى أن الفيلم نجح على مستوى الجمهور والنقاد، وكفاية أن سمعة الفيلم حلوة، ومحدش اتكلم عنه بشكل سيئ.
■ متى يبدأ الموسم الجديد من مسرح مصر؟
- فى المعتاد كل عام نبدأ بروفات الموسم الجديد أول رمضان، بحيث يتزامن أول أيام العرض مع عيد الفطر المبارك.
■ هل ترى أن مسرح مصر نجح فى جذب الجمهور مرة أخرى إلى المسرح؟
- الحمد لله مسرح مصر حقق طفرة كبيرة، لأن تقريبا مسارح القطاع الخاص كانت مش موجودة، وانتهت تقريبا عام ٢٠٠٣، وكانت المسارح مهجورة، والحمد لله رجعنا بالمسرح والجمهور رجع معانا، وبفضل الله بقالنا ٥ سنين «كومبليت»، ومعتقدش إن فيه حد حقق النجاح ده.
■ ما خططك الفنية الجديدة؟
- بالإضافة إلى فيلم «حرب كرموز»، الذى سيطرح فى دور العرض السينمائى فى عيد الفطر المقبل، أواصل حاليا تصوير مسلسلى الرمضانى المقبل «ربع رومى»، ويشاركنى البطولة محمد سلام، وبيومى فؤاد، وهالة فاخر، وميرنا جميل، ومحمد أوتاكا، ومحمد محمود، ومنير مكرم، ومجموعة كبيرة من ضيوف الشرف منهم أشرف عبد الباقى وأمير كرارة وأحمد زاهر وفتحى عبد الوهاب، والمسلسل من إخراج معتز التونى، وإنتاج سينرجى، ومن تأليف تامر إبراهيم ومصطفى عمر وفاروق هاشم، وسوف يذاع على قنوات «أون تى فى»، فى رمضان المقبل، وانتهيت من تصوير جزء كبير من المسلسل، لكن صراحة مش بحسب بالضبط أد إيه.
■ ماذا عن كواليس دورك بالعمل؟ وشعورك كونه أول بطولة مطلقة لك؟
- دورى ممثل فاشل، أو لسه مش لاقى فرصه كويسة، وطبعا فى قلق كبير، لأن أنا نازل فى موسم رمضان، وده موسم الكبار، بس اللى بيطمنى إني شغال مع شركة إنتاج كبيرة، ومخرج كبير تقريبا كل شغله ناجح.
■ هل تفضل أدوار الكوميديا أكثر؟ وما هو اللون اللي تحب تشتغله غير الكوميديا؟ وماذا عن الأكشن؟
- أنا بحب الضحك جدا، وبميل له، وعلى فكرة الضحك حاجة صعبة ومش سهلة، ولما تجيد الصعب دا شىء كويس جدا، وبكون سعيد جدا وأنا برسم الضحكة على وشوش الناس، وبخليهم مبسوطين وفرحانين لأن مش أى حد بيقدر يعمل كدا.
أما عن اللون الذى أحب أداءه غير الكوميديا أنا ممثل، وأحب أعمل أى حاجة، أما عن الأكشن، فبحبه برده ولى عملان تصنيفهما أكشن، هما فيلم «هروب اضطراري»، وكذلك فيلم «حرب كرموز»، وما زال أمامي الكثير الذى أتمنى تقديمه، وأتمنى فقط من الحاجات الجديدة اللى هعملها والناس مش متعودة علىَّ فيها تعجب جمهوري.
■ ما هو العمل الذى تعتبره نقطة تحول فى حياتك؟
- أعتبر كل عمل قدمته سلمة على طريق النجاح، ومسرح مصر، ومن قبله تياترو مصر هما من قدمانى للجمهور، وهما أكثر عمل فرق معايا، لأنى قبلهما مكنتش معروف، وبعدها فيلم «أوشا وفورتين»، الذى لاقى نجاحا كبيرا فى السينما، وهو أول عمل سينمائى أقدمه، فحط رجلى كويس فى السينما، وبعده أيضا فيلم «هروب اضطرارى»، اللى حقق أعلى إيرادات فى تاريخ السينما المصرية وصلت لـ٦٠ مليون جنيه مصرى، لذلك بحمد ربنا إنى شاركت فى العمل دا وكنت أحد صناعه.
أما فى التليفزيون فمسلسل «نيللى وشيريهان»، كذلك وضعنى فى منطقة كويسة، لأنه عمل ناجح، ونال نسبة مشاهدة عالية جدا، والناس حبته بشكل كبير جدا، أيضا مسلسل «هربانة منها»، للنجمة ياسمين عبدالعزيز، كان نقلة كبيرة لى، وأن آخذ دور البطولة أمام ياسمين فى أول مسلسل تليفزيونى لها، كان ذلك خطوة مهمة جدا، خاصة أن «ياسمين»، الممثلة الوحيدة، التى تعتبر نجمة شباك، والناس بتروح السينما عشانها، وصولا إلى مسلسلى الجديد «ربع رومى»، الذى يعتبر أول بطولة لى.
■ المجال الفنى الذى تعتز بالعمل فيه أكثر «السينما أم المسرح أم التليفزيون»؟ وماذا يمثل لك كل منها؟
- أنا أعتز بمهنتى كممثل سواء للسينما أو المسرح أو التليفزيون، ولكن المسرح له سحر خاص، وأستمتع جدا به لأن الجمهور بيكون أمامى، وبقدر فى نفس اللحظة أن أحصل على رد فعله واستحسانه بما أقدمه، على عكس السينما والدراما إن الفيلم يتصور ويتمنتج ويتم عرضه، أيضا ميزة المسرح أننى أعمل به وأنا متحرر بشكل كبير على خشبة المسرح، أما السينما فدائما محكوم بـ«فريم»، ولكن أنا أعشق مشاهدة السينما، وكذلك التليفزيون مهم جدا، لأنه يشاهده أكبر فئة من الجمهور.
■ هل هناك شخصية أو دور معين تتمنى تجسيده؟
- عمرى ما فكرت أجسد شخصية أو دورا معينا، وأى دور بيتعرض علىَّ وبيعجنى بوافق فورا، وعموما بحب أشتغل أى حاجة، ونفسى أعمل كل حاجة، فأنا طماع جدا فى التمثيل.
■ من نجم الكوميديا المفضل لك؟
- أكيد الزعيم عادل إمام، ودا من صغرى بعشقه وبيضحكنى، وكمان محمد سعد ملك الضحك، ومحمد هنيدى، فهولاء نجوم كبار فى الضحك، وأكيد أسماء تانية زى أحمد حلمى وكريم عبد العزيز، اللى بحس إنى شبهه، وبحبه جدا، فالحمد لله عندنا نجوم كبار فى الضحك ومواهب كوميدية عملاقة.
■ ما المواقف الصعبة التى مررت بها فى التمثيل؟
- لا يوجد ممثل لم يمر بمواقف صعبة، وكل منا مر بمواقف «رخمة»، و«سخيفة»، خاصة فى بداية المشوار المهنى، مثلا رايح تشتغل فى مسلسل بيطلب منك أوردر: «تعالى دلوقتى»، وبيدوك ورقة ويقولولك «خش قولها»، ومفيش لا مخرج أو حتى مساعد مخرج يقعد معاك يفهمك، وتلاحظ أنه قبل ما تتعرف، الناس كلها بتكون متضايقة منك من غير سبب، وبيضحكوا عليك ويتريقوا خلف الكاميرات، مع أنك المفترض ممثل مبتدئ ولسه فى بداية التمثيل، أكيد مش بروفيشنال وطبيعى إنك تغلط، ومش عارف مثلا مكان إضاءتى أو المارك اللى أقف عندها، ولحد دلوقتي بشوف ناس بيتعمل معاها المواقف دى، بس للأسف التفاصيل دى بتضايق جدا، وممكن تخلى أى شخص ميكملش فى التمثيل حتى لو هو موهوب.
■ ماذا عن تجربة «مسرح السعودية» وهل ستشارك به؟
- لا، هيكون فى شباب سعوديين بيعملوا مسرح سعودى بشكلهم وتفاصيلهم الخاصة، وأشرف عبد الباقى سافر عشان يحضر لهذا المشروع، وأتمنى المشروع ده ينجح وينتشر فى كل الدول العربية وكل دولة يكون ليها مسرحها، عشان المسرح يرجع تانى بشكل أوسع وأقوى.
■ هل ستخوض تجربة الإخراج مجددا؟
- لا أفكر فى تجربة الإخراج، وكل تركيزى فى التمثيل، وتقريبا السؤال بيتكرر علىّ كتير بس عايز أقول إن تجاربى الإخراجية كانت كلها فى المسرح.
