«حلاوة.. حلاوة والسم القاتل»

حد يفهمنا يا أسيادنا، معلش ثقافتى على أدى، ومش فاهمة، وعايزة حد يفهمنى، وأكيد فى ناس كتير زى حالاتى مش فاهمين، مش فاهمين إيه اللى بيحصل فى بلدنا، وعايزين حبايبنا من ذوى الخبرة والعقول النابغة والمسئولين اللى أصبحوا غير مسئولين عن اللى بيتقال بين الناس، ومش فاهمينه، يفهمونا حد يفهمنا. 

نحتفل هذه الأيام بالمولد النبوى الشريف وكالعادة المرتبطة بهذه المناسبة الدينيه التى هى من الثراث الشعبى المصرى يبدأ المصريون فى شراء علب الحلاوة، التى تصل إلى سبعمائة جنيه مصرى، بل أكثر من هذا قد تصل إلى الضعف فى بعض المحلات (حتى الحلاوة يا ولاد، طب ناكل إيه دلوقتى ياأسيادنا؟؟؟

حد يفهمنا؟؟؟ إيه علاقة المولد النبوى الشريف بحلاوة المولد والعروسة والفارس والحصان (الحصان يا أبويا أنا عايز الحصان يا أبويا) إيه علاقة الحلاوة بمولد النبى يا جدعان؟ لا مؤاخذة، وإيه كل التلزيق اللى فى السوق المصرى؟

(حلاوة... حلاوة) حد يفهمنا العادة ده من أين جاءت وأسبابها إيه؟؟؟

هناك عدة روايات منها أن الخليفة الفاطمى كان يشجع جنوده المنتصرين على أعدائه بتزويجهم بعروس جميلة، وأصبحت عادة فى وقت احتفالات النصر كل عام، بأن يقوم ديوان الحلوى التابع للخليفة بصناعة عرائس جميلة من الحلوى لتقديمها كهدايا إلى القادة المنتصرين وعامة الشعب.

فى رواية أخرى تتحدث عن أن الحاكم بأمر الله كان بيحب أن تخرج معه زوجته فى يوم المولد الشريف فى الموكب بثوب ناصع البياض، وعلى رأسها التاج، فقام صناع الحلوى برسم الأميرة والحاكم من الحلوى، فالحاكم تم صنعه على هيئة فارس يمتطى جوادا، وبعد ذلك أمر الحاكم بالله بأن تتزامن كل أفراح الزواج وعقودها مع المولد النبوى الشريف.

وهذا يفسر سر وجود العروسة فى المولد النبوى، فالعادات المصرية الدينية لها علاقة مباشره بالتراث الشعبى القديم، فعروس المولد تشبه عروس النيل فى عهد الفراعنة، فعروس المولد ليست لها علاقة بالمولد النبوى، بل ظهرت بعد ألف عام من الرسالة، فهى رمز البهجة والفرح، ولكن حد يفهمنا هل الحلاوة بها سم قاتل؟؟؟ والإجابة، نعم بها سم قاتل، وهو (السكر)، فحلاوة المولد بها كمية كبيرة من نسبة السكر، وتعتبر خطيرة لمرضى السكر والقلب والأوعية، وهى تزيد من نسبة الكولسترول فى الدم فالبعد عنها غنيمة للصحة، والاقتراب منها بحساب، فاهمين ولا محتاجين لحد يفهمنا.