فجر الفنان محمد حماقي، العديد من المفاجآت، في حفله الأخير بالساحل الشمالي، وتغنى ببعض الأغاني الجديدة من ألبومه منها "خلينا زي ما حنا"، التي كتبها الشاعر رمضان محمد، وكان من المقرر طرحها في ألبومه الأخير "عمره ما يغيب"، إلا أن حماقي فضل تأجيلها.
وعلق رمضان محمد، معتبرًا ذلك بمثابة رد اعتبار له، إذ كتب محمد، عبر صفحته الشخصية على موقع التواصل الاجتماعي "فيس بوك"، اليوم الأحد: "هحكيلكوا حكاية صغيره بمناسبة إن حماقى غنى خلينا زى ما حنا فى 2015 الغنوه دى كانت بتتنفذ وبتتسجل علشان هتنزل فى ألبوم عمره ما يغيب وف أخر وقت قبل نزول الألبوم إتشالت والسبب كان عند حماقى مش حد تانى مع العلم هو بيعشق الغنوه دى..المهم أنا زعلت جدا ونفسيتى كانت ف الأرض وطبعا كنت كعادتى بعلن قبلها إنى خلاص نازل فى ألبوم حماقى 2015 وطبعا الناس إللى بتحبنى وبتحب عمومآ الخير للناس كانت فرحانه علشانى وزعلوا برضه لما منزلتش إنما كان فى ناس وأنا عارفهم بالإسم منفسنيين وكارهين الخير ليا ولغيرى إستغلوا عدم نزولها وهاتك ياكلام وتريقه وألش وفاكر واحد منهم كتب على صفحته (مابلاش تحطوا نفسكوا فى مواقف بايخه وكان ليه من الأول الكدب وهنزل مع حماقى وانت استحاله تحلم بيه أصلا)..مع العلم إنى قبل حماقى نزلت مع نجوم كتير وليا أغانى ناجحه الحمدلله...المهم أنا كنت بشوف وأسمع وأسكت لأنى واخد عهد على نفسى من يوم دخول المجال ده إنى لا هبص ورايا ولا تحت رجلى ولا هركز مع النوع ده من الأشباح أو إللى نفوسهم وموهبتهم ضعيفه...بس النهارده وبعد ماحماقى غنى الغنوه وأعلن عن نزولها وأنا بقلب فى الشات لقيت ناس من إللى أنا بحكى عنهم دول إللى مسبوش كلمة شماته مقالهوش فى 2015 بيهنونى بنزول الغنوه..أنا إتصدمت حقيقى وطبيعى ميكتبوش كومنتات متشافه علشان شكلهم إدام بقية العصابه.بس أنا بحمدالله عقلى أكبر بكتير منهم ومن كلامهم أنا مش داخل المهنه دى أهزر أنا داخل علشان أبقى رقم1 فيها وعندى ثقه فى موهبتى وذكائى يؤهلونى لده..ومش غرور فى فرق بين الثقه والغرور...والناس اللى فرحتلى من قلوبها قسما بالله أنا بموت فيكوا وهتفضلوا على راسى والناس المنفسنين اياهم انا عارفكوا وسايبكوا على الصفحه علشان تتعلموا من واحد عايز ينجح ويكمل ويبص لإدام بس وبدعيلكوا بالهدايه....طولت عليكوا بس لازم كنت أقول الكلام ده #رمضان_محمد".
