نشرت الفنانة رانيا فريد شوقي تدوينة على صفحتها بموقع التواصل الاجتماعي "فيس بوك" في ذكرى رحيل والدها الفنان الكبير فريد شوقي قال فيها: "النهاردة الذكرى الـ19 على وفاة أبويا الملك فريد شوقي والأب أبو البنات أمتى وازي عديت السنين دي كلها والله ماعارفة يااااه وحشتني أووووي عارف أكتر حاجة وحشتني إيه ضحكتك اللي تفرح القلب وتحسيسني بجمال الدنيا أما حضنك فده المادة الخام للحنية والامان عارف يا بابا أنا بحمد ربنا على نعم كتيررر أولهم إنك أبويا مش بس لأنك فنان عظيم وأسطورة مستمرة حتى بعد رحيلك والكل دايما بيحكي عن جمال أخلاقك وجدعنتك وتواضعك وخفة دمك وطيبتك وعطائك لكل حبايبك وزمايلك وحتى اللي متعرفهمش كنت بتساعد الكل وحبك لأبوك وأمك وأخواتك وتعمل المستحيل عشان تحقق لهم طلباتهم من غير حتى ما يطلبوا كنت ابن بار بأهله وتوفوا وهما بيدعولك وكانوا فخورين بيك، تاني حاجة بحمد ربنا عليها اللي انت زرعتوا جوايا الإنسانية بكل معانيها الإنسانية اللي بقت عمله نادرة اليومين دول انا فاكرة كل كلمة ونظرة وشخطة وضحكة وهزاره عشتاها معاك أنا الحمد لله عايشة باسمك وسيرتك الطيبة وحب جماهيرك العريضة في كل العالم العربي بيقولوا إن الإنسان له نصيب من اسمه وانت اسمك فريد لأنك فعلا فريد الروح والقلب والعطاء والحنية والفن وكل حاجة انت فريد فيها واي حد عرفك بيقول كده انا فخورة اني بنتك بتشرف باسمك وأتباهي بيه اديت رسالتك الفنية بكل شرف وحب وأمانة ورسالتك الإنسانية كمان ولو في تصرفات مننا أسأت لاسمك يبقي احنا اولادك اللي مسئولين عنها لانك ربيتنا صح وسامحنا عليها".
وتابعت قائلة : "لما ولدت بنتي فريدة طلعت من المستشفى على المقابر عشان اوريهالك وأعدت اكلمك وقولك فاكر لما انا كنت حامل وقولتلك نفسك في ولد ولا بنت قولتلي بنت قولتلك انت مازهقتش من البنات واعدنا نفكر هنسميها ايه لو بنت وايه لو ولد وانت تقول اسامي وتضحك وسبحان الله ماجبناش سيرة اسم فريدة ده خالص واول ما ولدتها سميتها فريدة بس انت كنت مشيت وسبتني مالحقتش تشوفها عشان كده جتلك المقابر تشوفها وتفرح معايا وسبحان الله يوم تخرج فريدة من المدرسة روحك حضرت معانا عشان تفرحنا وتقولي انا معاكم وحاسيس بيكم. لو قالولي نفسك في ايه؟ نفسي ربنا ياخد اللي فاضل من عمري وترجع تشوف وتفرح وتلعب باحفادك فريد وفريدة وعلي وملك حتى ملك على اسمك الملك، دول افتقدوا كتير اوي بغيابك، اقولك سر تامر جوزي كنت هتحبه اوي لانه في كتير منك، بحببببببببك يا فريد عمري".
