رصدت كاميرا "البوابة نيوز" العديد من العاملين في نهار رمضان، بالرغم من طول ساعات الصيام، ودرجات الحرارة المرتفعة، التي لم تمنعهم من البحث عن "لقمة العيش".
وقال إبراهيم خالد "عتال": "أنا بنزل للشغل من 7 الصبح عشان أكل عيشي، وبفضل قاعد لحد ما يجي رزقي، واليومية بتكون على حسب الشغل، وما بتعديش 100 جنيه".
وتابع: "شغلي أكسر الحيطان، وبكسر في الخرسانة والبيوت والسيراميك، وفي رمضان يوم بنشتغل وعشرة لأ، واديني قاعد وصايم مستني رزقي".
وقال خالد عبدالقوى: "أنا بشتغل في التشوين والتكسير والحدادة المسلحة، وبقعد في الشارع استنى رزقي من قبل 7 الصبح في نهار رمضان عشان عندي عيال وربنا اللى بيقوي، بس العملية نايمة".
وفي نفس السياق قال "علي"، أحد عمال النظافة: "أنا بلف الشارع من الساعة 7 الصبح لحد 2 الظهر، ومرتاح في شغلي، شغال وأنا صايم ومفيش فرق بين أيام رمضان، وباقي أيام السنة نفس المواعيد".
واتجهت "البوابة نيوز" إلى العاملين بالمخابز، حيث قال "أحمد"، فران، إن الشغل بيكون قليل في رمضان، وبنبدأ بعد الظهر لأن الناس صايمة، وبنقابل معاناة الصيام، خاصة أني واقف قدام النار، متابعًا: "إحنا الطبقة التعبانة وياريت المسئولين يشوفونا شوية".
وقال "مختار"، عجان في أحد المخابز، الجوع والعطش في نهار رمضان: "أنا طبيعة عملى بشتغل 12 ساعة متواصلة، لكن عملي في الصيام شاق ومتعب ما بنعرفش نشرب مياه وريقنا بيكون ناشف وتعبانين وبنشقى وبنتعب عشان الجنيه".
