علق "أحمد الركايبي"، ابن عم شهيد الشرطة في التفجير الإرهابي بكنيسة مارمرقس بالإسكندرية عماد الركايبي، على استشهاده خلال أداء واجبه، أمس، عبر حسابه على "فيس بوك".
ورفض الركايبي المتاجرة بدم ابن عمه، من خلال وسائل التواصل الاجتماعي، أو في وسائل الإعلام، وكتب: "مع أني في الفترة الأخيرة مش بتكلم في أي حاجة، بس اللي حصل ده لازم يخليك تتكلم".
1- ربنا يرحمك يا ابن عمي.. وبنحتسبك عند ربنا من الشهداء.. وربنا يصبرنا على فراقك
2- في البلد دي يا ريت متعملش شير لحاجة من غير ما تشوف.. ولما تشوف بردوا متعملش شير علشان إحنا أقسم بالله في مستنقع زبالة.
3- في ناس بتقول: إنه ابن عمي حضن اللي كان داخل يفجر نفسه.. وفيه الفيديو اللي كل الناس شافته والواد بيفجر نفسه عند البوابة.. وأنا بتكلم علشان مش عاوز حد يتاجر بدم واحد من أقرب الناس ليا.. ابن عمي بطل في نظري.. مش شرط إنه يحضن الإرهابي علشان يكون بطل.
4- هوا بطل علشان هوا أنضف ظابط شفته في حياتي.. عمره ما جه على حد أو ظلم حد.. قدامي حصل أكتر من موقف كان ممكن يستخدم فيه "القانون" علشان يحبس ناس ولكن كان بيستخدم روح القانون.. وبيدي للمخطئ درس عمره ما ينساه.
5- هوا بطل علشان يوم الانفجار نازل من بيته 4 الفجر علشان يأمن الكنيسة.. مع أنه بكل سهولة كان ممكن ميروحش.. ومحدش في الشرطة كان حيقدر يكلمه.. علشان إحنا عيلة عندها كمية رتب مش طبيعية.
6- هوا بطل علشان قبل التفجير بـ10 دقايق كلمه السواق بتاعه وقاله: في تفجير في طنطا يا باشا.. لو عاوزني أجيلك وتروح.. فقاله لا ربنا يستر وماسبش مكان خدمته وروح لأطفاله الـ3 اللي مش حيشفوه ولا حيشفهم تاني.
7- مش شرط إن أنت تشوفوا بطل.. وميهمنيش إنك تشوفه بطل.. بس يا ريت تدعيله وتدعيلنا معاه.. ومتنساش إننا كعيلته ما تجرناش بدم ابننا ولا عاوزين حد يتاجر بيه.. فيا ريت بلاش كلام إنكم عاوزين تعملوا منه بطل وهوا معملش حاجة.. إحنا فينا اللي مكفينا.
يذكر أن كنيستي مارجرجس بطنطا، والمرقسية في الإسكندرية، تعرضتا، أمس، لتفجيرات إرهابية تسببت في إصابة واستشهاد العشرات من المواطنين.
