صوت الناس.. شروخ بيوت داير الناحية تهدد حياة السكان
يصرخ الأهالى بعدة شوارع فى منطقة «داير الناحية» التابعة لحى الدقي، من الرعب الذى يلازمهم داخل منازلهم، خائفين من انهيارها، لقدم بنائها وامتلائها بالشروخ والفتحات التى تسقط عليهم الأتربة. ويناشد الأهالى المسئولين طالبين المساعدة فى تخفيف الرعب الذى يهاجمهم طوال الوقت والخطر الذى يعيشون فيه، والتقى فريق صوت الناس بـ«البوابة نيوز» أهالى «حارة النبايعة وحارة الجزار» بمنطقة داير الناحية بالدقى، ليرووا مأساتهم. يقول عم أحمد، المقيم بمنزل رقم ٨ بحارة النبايعة بداير الناحية: «مشكلتنا أننا على قد حالنا وبيوتنا هتقع علينا، ومش معانا فلوس نقدر نرممها أو نبنيها مرة تاني، والشروخ ملأت المنزل، وإحنا ونايمين بتنزل علينا تراب، وأكثر من مرة نسد الشروخ بالأسمنت، ولكن تظهر الفتحات فى مكان تاني، ودا المأوى الوحيد لينا، محتاجين نعيش فى أمان وراحة بدل القلق الذى يلازمنا طوال الوقت، وفى منزل تانى هنا جارنا، وهو رقم ١٢، هيقع على صحابه فى أى وقت، والأسلاك عارية فيه، وبه كثير من الأطفال وناس عيشتها على قدها، مش هتعرف تأخذ شقة إيجارها ٥٠٠ جنيه».
أما عم محمد، المقيم بحارة الجزار بداير الناحية: «عندى أربع عيال والبيت كله شروخ وأسلاك الكهرباء خارج الجدران، والحمام مشترك للبيت كله، وتعرضت للصعق بالكهرباء أكثر من مرة وربنا ستر، وحالنا على قدنا، مش عارفين ناكل ولا نشرب ولا نبنى البيت، وبخاف عيالى يدخلوا الحمام وحدهم، أو يلمس أى طفل الأسلاك ويتكهرب، وقدمنا أكثر من شكوى عشان نرمم بيوتنا، أو حد يساعدنا فى أن يبنى لنا مبنى من البلوك يحمينا حتى لا نتشرد بالشوارع». وتقول أم سيد المقيمة بمنزل ٤ بحارة الجزار: «لأننا فقراء صوتنا مش مسموع، منتظرين البيوت تقع علينا وحد يموت ولا عيل تحصله حاجة عشان يتحركوا، إحنا بنناشد المسئولين بإنقاذنا من الخطر الذى دمر حياتنا وجعل معيشتنا فى قلق طوال الوقت وخوف من أن تنهار المنازل علينا فى أى لحظة».