محمود العسيلي يرد على منتقديه بتغريدة ساخنة
قرر الفنان محمود العسيلي الخروج عن صمته، بعد تعرضه مؤخرًا لهجوم شديد من قِبل بعض الملحنين والشعراء الشباب، إضافة الي الجمهور، بسبب وصفه لهم أنهم لا يحترمون خصوصيته، بسبب إرسالهم أغاني له على "واتس آب" بكثرة، وهددهم بأنه سيضعهم في قائمة "البلوك".
وعلق العسيلي، عبر حسابه الرسمي بموقع "تويتر"، قائلًا: "واضحٌ من رد الفعل على التويتة الأخيرة أن الناس مبتفهمش يعني إيه خصوصية بني آدم ومش فاهمين بردو الفئة اللي أنا بتكلم عليها من الناس اللي بتطاردك على تليفونك والواتس آب بتاعك بشكل جنوني، وطلعت أنا جالد المواهب الشابة ومغرور وتنك وشايف نفسي ومدّعي".
وأضاف: "كتير نصحوني أني ماردش خصوصًا بعد الكم الرهيب من قلة الأدب والسفالة والسواد اللي شوفتو في الريبلايز.. عمر ما كان الجري ورا حلمك يخليك تعترض خصوصية غيرك بالشكل دا.. ودا اللي خلاني أكتب التويتة الأولانية.. عارف إن الموضوع صعب، بس في طرق تانية توصلك".
واختتم حديثه قائلًا: "الحمد لله رب العالمين أنا أي حد موهوب بجد وبيوصلي شغله بطريقة محترمة بجد بحاول أساعده وأقوله رأيي وأشوفله سكك مختلفة حتى لو شغله مش مناسبني فنيًّا.. وعلى فكرة الميل بتاعي موجود وبردّ عليه وحطه هنا وعلى الإنستجرام وشكرًا".