ماسحة أحذية: نفسي أطلع عمرة
ما بين الأمنيات والمعاناة، تحدثت أم محمد صاحبة الـ ٥٥ عامًا أثناء عملها كماسحة أحذية فى ميدان طلعت حرب بوسط البلد لـ«البوابة»، قائلة «ابنى الوحيد معاق ذهنيًا وجوزى متوفى، وباخد معاش السيسى ٣٢٠ جنيها فى الشهر، وإيجار شقتى ٢٠٠ جنيه، ويدوب المعاش بيكفى الإيجار والمياه والنور».
وأضافت «بشتغل فى اليوم ساعة أو ساعتين، أنا مريضة عندى النقرس والسكر والضغط والقلب، وتعب عليا إنى أنزل من بيتى، مش بقدر أوصل للأتوبيس أركب بس لو مشتغلتش هعيش منين أنا وابنى؟». وتابعت السيدة الخمسينية «مليش حد غير ربنا، أهلى وأهل جوزى نسيوني، كل واحد فيهم عايش لنفسه ومحدش بيساعدنى غير اللى خلقني». واستكملت «كنت زمان بياعة على الرصيف، بس تعبت فترة وقعدت فى البيت ومش معايا فلوس أجيب بضاعة اشتغل بيها، والبلدية ساعات بيتعاطفوا معايا ويسيبونى أمسح الجزم واسترزق وساعات بيقولولى قومى من هنا».
وأضافت «بلمع الجزمة بـ٣ جنيهات وساعات الزبون بيدينى ٥ جنيهات وبيمشى، والشغلانة خفيفة معايا لأن الشباب بيقولوا لى إنتى ست كبيرة عيب نحط رجلنا فى وشك والستات برضو بتتحرج منى».
واختتمت السيدة الستينية حديثها «عمرى ما مديت إيدى وقلت لحد ساعدنى، أنا تعبانة، عندى ألمع جزم أكرم لى من مد الأيد، قدرت اشتغل قدرت ماقدرتش، ربنا يتولانى، مش هيقطع رزقى، طول ما أنا عايشة على الأرض ليا لقمة ورزق عند ربنا وأمنية حياتى أطلع عمرة وأموت هناك فى بيت النبى».