أشهر كهربائى في الدقي: "الحظ مش بس فلوس.. والكشك مخليني مبسوط 24 قيراط"
«أنا مش هقف مكتوف.. ولا هموت من الخوف، قدام حبة ظروف، أنا لازم أكون أو لا أكون، بقوتى وصبرى هتحدى كل الكون، بصنعتى أنا ملك، ولا حد يحكمني».
«رمضان محمد إبراهيم» تعدى عقده الخامس بعامين، يعمل منذ نعومة أنامله «كهربائى سيارات» منذ أن كان «بلية» وحتى أصبح أشهر «صنايعي» وأصبح رب أسرة لثلاثة أبناء من بينهم ذكر، لم يعرف سوى تلك الحرفة مهنة له، أخذ حظه شهرة، لكنه فى المال كان أقل حظا، وما دام قانعًا لازمه الرضا.
يقول «إبراهيم»: «من يومى وأنا كهربائى سيارات حريف من أول ما كنت بلية، ولما بقيت صنايعي، الحمد لله بقيت من أشهر الصنايعية فى الدقي، وأجرت جزءًا من ورشة كبيرة أركن فيها عدتى وأشتغل لنفسي، لكن قلت ما بدهاش لازم تكون لى ورشة لوحدي، ونفذت أمنيتي».
ويتابع قائلًا: «لكن رغم إنى محظوظ، ما قدرتش أوفر ورشة كبيرة، وأجرت «كشك» على ناصية شارع بالدقي، فيه جزء كبير من العدة، وإن احتاجت حاجة بجيبها من البيت، وبركن السيارات فى الشارع واشتغل، وليا زباينى بيجوا ليا مخصوص».
ويختتم حديثه قائلًا: «الحظ مش بس فلوس، الحظ رضا بالعيشة، حتى لو الرزق قليل، حاسس إنى ملك بالكشك ده أعظم من أى ورشة فخمة، ومبسوط ٢٤ قيراط، وراضى مكفى بيتى ولو يوم شغال و١٠ قاعد، المهم الرضا».