متخصص مشورة أسرية: الاحتياجات النفسية مرتبطة بالأحاسيس والمشاعر
يقول إميل لبيب متخصص مشورة أسرية إن الاحتياجات هى نقص شىء معين عند الكائن الحى، طول ما هو حاسس أنه غير مسدد يفضل غير هادئ ومتوتر نتيجة النقص ده، وبيحاول يسده بأى طريقة، والاحتياجات أنواع.
الاحتياجات النفسية، اللى هى مرتبطة بالأحاسيس والمشاعر، وطريقة التعامل معاها اللى بتختلف من شخص للتانى، وتوقيتها بالنسبة للشخص نفسه.
وبتكون شخصية، يعنى مش كل واحد احتياجه زى التانى، لأن تجاوب كل واحد فينا مختلف عن الآخر، زى مثلا لما حد يقول نكتة وواحد يضحك عليها والتانى يحسها سخيفة، أو اثنين يشوفوا حادثة واحد يجرى يقدم المساعدة والتانى يجرى برضه بس الناحية التانية.
الاحتياج ده ممكن يتغير من وقت للتانى، فى وقت محتاج آمان، وقت تانى محتاج تشجيع، وقت محتاج حماس، وقت محتاج حضن دافئ، وقت محتاج تسيبه لوحده يهدأ، الوقت ده ممكن يكون:
- مرتبط بالمرحلة العمرية فاحتياجات الطفل غير احتياجات المراهق، مختلفة تماما بالنسبة للراشد.
- مرتبطة بالحالة النفسية للشخص ذاته، فى أوقات ضغط الامتحانات يحتاج لتشجيع ودعم، وفى وقت الحزن يحتاج لتعزية وسكينة، ولما يكون غضبان يحتاج للهدوء والتفهم، كل حالة تحتاج ما يناسبها وما يناسب شخصية المحتاج.
من الأشياء المهمة فى الاحتياجات التدريب على التعبير عنها، حتى يسهل سدادها، صعوبتها فى رصدها لو ما اتدربناش على تحديدها وتسميتها، فالحزن غير الغضب غير الإحساس بالهجر، ومعرفة أسبابها الحقيقية، علشان نقدر نفهم مصدرها إيه.
التدريب يحتاج ممارسة وتكرار، مافيش حاجة اسمها جربت وما نفعتش، وتسأل جربت قد إيه، مرة، طيب وهى مرة تخليك قادر تعبر، اعتبر نفسك فى الجيم، مش هاتكون فورمة إلا بعد وقت وجهد واستمرار على التدريب، ولو كسلت وما استمرتش الفورمة تبوظ، الفكرة فى الاستمرار والمداومة.
الحب مثلا بنحتاجة حتى وإحنا كبار من الأصحاب والأهل وشركاء الحياة، بيبقى فارق فى حياتنا، لكن نقصه فى الطفولة بيسبب تشوه فى الشخصية، حتى لو اتحب من كل الناس، هاتفضل الفجوة اللى جواه بسبب نقص الطفولة موجودة، وهايحتاج يشتغل عليها علشان يتكيف ويتعايش مع نقصه.