بالصور.. أشهر فطاطري بدمياط: "فخور بعملي وهفضل في المهنة لآخر عمري"
بيديه الخفيفتين، تجد لفات وحركات مبهرة لا يمتاز بها إلا القليل فى صنع الفطائر والبيتزا، يلفت انتباهك ما بين روعة الحركات ووجهه البسيط، وما إن تتحدث معه يرسم البسمة على وجهك، إنه عم "سيد أبوعليوة" أشهر فطاطرى فى محافظة دمياط، يبلغ من العمر 51 عاما، والذى قال لـ"البوابة": "مهنة الفطاطرى وارثها أبا عن جد، ومن أول يوم اشتغلت فطاطرى حبيت المهنة ومقدرش أستغنى عنها، بقت زى الهوا بالنسبة لى".
"أنا من مصر القديمة، بس ظروف الحياة والدنيا اتنقلت لدمياط، واشتغلت هناك والناس كلهم عارفينى، ومفيش حد فى دمياط أو رأس البر مبياخدش فطير من عندى.. عجينة الفطيرة اللى بعملها محدش بيقدر يقاومها".
"الروح الحلوة تخلى العجينة حلوة".. هكذا وجه "أبوعليوة" نصيحته لكل ست بيت، قائلا: "الأكل لما بيتعمل بنفس حتى لو مقاديره قليلة بيبقى طعمه حلو، والروح الحلوة والنفس الحلوة تخلى العجينة حلوة"، متابعا: "المهنة اللى ورثتها عن أبويا وجدى هورثها لأولادى، وفخور أنى فطاطرى وهفضل فى المهنة لآخر نفس فى عمرى".