متعكنن خُد بعضك وانتحر قفزًا من فوق السرير
حزر فزر كام حالة انتحار ف شهر مارس المنحوس ؟؟ .. نقول خمسة .. عشرة .. طب عشرة ونص .. لأ .. زود شوية .. حداشر ونصين .. برضة لأ .. يبقى واحد وعشرين ولا كلمة زيادة .. شاطر .. هما كده بالظبط ، واحد وعشرين ، انتصوا في دماغهم وقرروا الانتحار تحت عجلات المترو أو من فوق السطح .. فريق من الأخوة المنتحرين فضلوها موتة سهلة وهادية وغير مكلفة "انتحروا شنقا بحبل الغسيل" .. وتاني تاني رجعنا لأفلام سينما الستينات الهابطة: "غرام وانتحار" .. التشريح الجنائي للجثث الـ 21 ، استبعد الشبهة الجنائية .. خبراء النفس والاجتماع ووجع القلب أكدوا أن معظم حالات الانتحار ناتج عن ألم عاطفي .. وجع قلبي .. صدمة في حب بنت الجيران .. وحالات أخرى رأت الموت راحة واستراحة من الهم اليومي وأزمات الفكة الطاحنة وعياط العيال المتكررة من الجوع .. وفريق تالت قرر العصيان ورفض فكرة العيش على كوكب مصر والصعود إلى العالم الآخر تحت شعار الهوا فوق أحلى وأحلى بعيدا عن تلوث قش الرز وأكل السمك المسرطن والفول أبو سوسة، وشرب مية المجاري وغم الإخوان .