"محمد سمير": زمان كنت بغني لـ"منير" بس بتوزيع جديد

يبلغ محمد سمير من العمر 24 سنة، درس الهندسة، وتوجه بعد ذلك للدراسة بمعهد الموسيقى، وكان في ظل دراسته للهندسة يشترك في العديد من كورسال الـ"فوكاليز" بالأوبرا، مع د. محمد عبد الستار لمدة عام كامل، ثم توجه بعد ذلك للتطبيق العملي، وبدأ في الغناء مع فرقة المصريين بساقية الصاوي، وظل مع "المصريين" 3 سنوات، وسافر معهم العديد من المهرجانات التابعة لوزارة الثقافة في الإسكندرية و دمنهور..

بتغني من زمان ؟
كنت بغني لـ "منير" بس بتوزيع جديد، زي مثلّا أغنية الليلة يا سمرا، وكمان كنت بغني حاجات قديمة لعمرو دياب، ده غير كمان أغاني فرقة المصريين.

واشمعني الغُنا بالذات؟
لأني من زمان بحب أغني، وكان عندي بيانو بطلع الأغاني وأعزفها عليه، وأنا بشكل عام بحب أوصل أي فكرة من خلال الفن مزيكا بقي أو غُنا.

دخلت المعهد امتى؟
في 2013، قسم صوت، وكنت بتعلم كمان آلات زي العود و البيانو، وطبعّا قبل ما أدخله عديت على اختبار صوت عشان يعرفوا هل أنا مناسب للمعهد ولا لاء.

ليك أغاني بتاعتك؟
أول أغنية ليا أسمها "الله يجازيك"، كلمات: أحمد عبد النبي، ألحان:مودي منير، توزيع: فادي إبراهيم.

عملت حفلات لوحدك؟
لأ بس بفكر طبعّا، وده لما يبقى عندي رصيد كافي أقدمه، وجمهور كافي يستقبل، وغالبّا ممكن تبقى في الساقية.

شاركت في مسابقات أغاني قبل كده زي آراب أيدول أو ذا فويس؟
لأ.

ليه؟
عشان مش مقتنع بها، وحابب أعمل نفسي بنفسي مش عن طريق برنامج.

كمان 3 سنين شايف نفسك فين في مجال الغُنا؟
هكون عملت حاجة واسمي معروف في الوسط، وليا جمهور بيسمعني، وبعمل حفلات في أماكن مختلفة.