قال شكسبير، إن أغبى امرأة تستطيع أن تخدع أذكى رجل، وأذكى امرأة تنخدع بسهولة من أغبى رجل، لذا عزيزتى المرأة عليكِ أن تعرفى أن ذكاءك ليس مقياس نجاحك مع الرجل، ويكفي أن تكونى امرأة فقط، في هذا المقال نقدم لكِ بعض النصائح الثمينة لتستطيعى التعامل مع ذلك الكائن الذي من المفترض أنه يشاركك الحياة:
*إذا دق قلبك تجاه شخص ما تكونيش زى العبيطة طول النهار قاعدة تبصى له وانت هيمانة في عينيه، لأنه هيعتقد نفسه توم كروز اللى مجنن البنات ويترسم عليكى، لكن ببساطة لازم تبدئى بنظرات متقطعة تصحبها ابتسامة خفيفة دون إطالة أو إسفاف، وبمجرد ما تشعرى إنه انتبه لاهتمامك به لازم تتوقفى فترة ولا تعطية أي اهتمام ولا حتى تبصى له، طبعا هو هيتجنن ويبدأ دماغه تودى وتجيب ويسأل نفسه إيه اللى غيرك، لكن ما تقلقيش الارتباك هيفقده تركيزه وييجى هو يكلمك بمنتهى الحب والهدوء والرقة، وقتها اعرفى إنه خلاص وقع في هواكى واعملى اللى انت عاوزاه.
* لازم في فترة الخطوبة واللى بتبقى كلها حنية وكلام معسول، لازم تسجلى لخطيبك كل كلمات الحب والغزل، طبعا هتستغربى لكن دا على سبيل تأمين النفس، للوقاية من المقولة الشهيرة لكل رجل "لا اخترتها ولا أحببتها ولا أعرف كيف تزوجتها" لكن طبعا لما تطلعيله التسجيل هيسكت خالص وموش هيجرأ ينطق بكلمة.
* في فترة الخطوبة لازم تغيرى استايل حبيبك اللى بيلم نحوه البنات، يعنى لو البنات بتحبه كاجول خليه كلاسيك والعكس علشان موش كل شوية تنزعجى من تعليقات معجباته يمكن التغيير يزعلهم وينفضوا من نحوه، وما تقلقيش هو في الفترة دى بيبقى زى أعضاء مجلس الشعب التابعين للحكومة، وبيقولك على كل شيء "موافقون".
* بعد انتهاء مراسم الزواج وخلافه، لا تكثرى من تدليله حتى لا يعتاد ذلك، فكل شيء موزون معقول، اجعليه يدللك كثيرا كثيرا كثيرا، واذا اعترض وقالك كل شيء بالمثل ازعلى ولو الزعل ماجبش نتيجة عيطى، ولو العياط ماجبش نتيجة لا مانع من إغماءة خفيفة هتخليه يتجنن من الخوف عليكى، لكن لو ما اتجننش يبقى دا مفيش منه أمل واخلعى منه وانت الكسبانة.
