شيفاني عيونه وقلبه ضرير
غاوي لف على تحوير
كأن مفيش ابداً تأثير
وغلطه صعب الاحتمال
كل غلطة وليها تبرير
فاكر قلبى لعقله أسير
تلاقيه نار على زمهرير
وإن زعلنا بقا موال
أزعل ومعايا الحق
تتواجه ومنين الحق
بين ألف طريق على شق اشتق
يجيب اللوم علينا في الحال
ويغير في الكلام
ويحطم في الاحلام
ده مسيره للأيام
تسقيه مُر الأهوال
مابينه وبين الدنيا
حاجز يعلا في ثانية
يشوفها دنيا تانية
سودة في كل الأحوال
خلاص ضعيني منه
غصب عنى وعنه
بغروره بغدره بظنه
و كذبه يمين وشمال
واخدها عافيه وباع و ذراع
يا إما يقول يلا الوداع
بين حبى و وجبروته صراع
بيهد ع الدنيا الآمال
عايز يعيش مرتاح مبسوط
لو التمن هيكونلى الموت
يدفعو و يحط شروط
ياقبل ذل و نار و ضلال
ارضى غموضه يا أما يفارق
صبحه يغرب ليله يشارق
و أنا كدة عقلى خلاص مش طايق
يحرق يلعن يلا يفارق
يلا يا ظالم ع الترحال
مبنبكيش ع اللى مبكاش
بيعه قريب مبيستناش
يلا يكتر من أبو بلاش
والغربة تداوى لو الليل طال
بيع الحب وبيع العشرة
بين معدن دهبه قشرة
حب ايه..؟!.. ده أكبر فشرة
مين يهمك ..؟!.. وايه اللى اتقال
صبحت يهمك نفسك بس
مات ضميرك فقد الحس
داري ملامحك ..كارهة أبص
و قلبى رافض الوصال
دارى كلامك وسط الصوت
خدر عقلى .. كلام و يفوت
بتقول نحاسك أصله ياقوت
و فرضت صيام واحد شوال !!
يا حبيبى اعمل ما بدالك
أنت خلاص اتبدل حالك
أصبح كل أهلك مالك
دايس الكل و ليه شيال
بكرة هترجع دنية أصلك
لما تحن برجوع لنفسك
هيكون مات الحب و وصلك
مش هتنوله ولا في خيال
قضيها سفر .. مش هاعتبر
غير حبيب على قلبه قدر
مش هنكسر.. مش هتقهر
مش هلعب زيك على وتر
لعبة حسابات سموها البشر
خفف من الدنيا الأحمال
لعبة حسابات جوة الزمن
العبها تدوس على كل المحن
بيع نفسك و اقبضلها تمن
ارضى غرورك.. و املك مال
شروط اللعبة بجرة قلمك
كام يرضيك لو تاخد تمنك؟!
و لا تمن ما تفارق حضنك؟
تاخد كام و تنسى نفسك؟
أهلك ناسك أصلك بلدك
لزمك كام يكفى تسيب حبك؟!
و شوف بالمرة سعر لقلبك!
كله بتمنه حلال في حلال
ما انت هتشقى شقا الرجال
لحد ما توصل للمنال
أصل الشقا مش لعب عيال
نسيت تحط سعر مهم
بكل رفضك لو مهتم
تسعر نفسك وعندك دم !
و ده كان أهم سؤال
كام ثمن رفض دخولك من سكات
جوة لعبة الحسابات
طبعك بان!!!
لو علقت فى صدرك رفضك حتى وسام
برضو رضيت و قبضت في أصلك باستسلام
خضوع تسليم مع الايام
مشيت في جنازة الاحلام
ليك و ليها تعظيم سلام
بلا عتاب ولا كلام !
على دنيا اللعبة مع الترحال
