( المواطن الغلبان حسن حصاوى يغشي عليه من حين لأخر.وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه).
( عاد المثقف إلي المقهى الذي يرتاده حصاوي بعد غيبة )
حصاوي حمد الله ع السلامة.شايفك يعني مبسوط.خير؟.
المتسقف فعلا. مبسوط وسعيد بخبر حصول " ملالا " علي جائزة نوبل للسلام
حصاوي ما تأخذنيش. أنا مش متسقف زى حضرتك. تطلع مين " ملالا " دي؟.
المتسقف دي باكستانية عمرها 17 سنة بس.تصور؟.
حصاوي شيء جميل خالص. وعملت إيه ؟
المتسقف أجتمعت مع الرئيس أوباما وقالت له ( أنه يستطيع تغيير العالم ).
حصاوي هايل. بس أزاي يعني؟.
المتسقف بأنه يبعت بالكتب بدلا من السلاح للبلاد الآخرى.مشددة علي أن أفضل طريقة
لمحاربة الإرهاب هي الاستثمار في التعليم.
حصاوي الله.ينصر دينها.جابت التايهه.
المتسقف مش كده والنبي؟.
حصاوي طبعا دا عين العقل.
المتسقف وقالت له الكلام ده قدام ألف واحد يوم التلات اللي فات.وقالت( رسالتي كانت بسيطة جدا للرئيس (قلت له أنه بدلا من إرسال السلاح والبنادق وإقامة حروب أرسل كتبا ومعلمين إلي بلدان العالم).
حصاوي وبعدين أوباما كان رده إيه ؟.
المتسقف ما قالتش رد علي طلبها بشكل واضح.واكتفت بقولها (بأن رده كان سياسيا إلي حد ما كما هو دائما.)
حصاوي ما هو دا المتوقع.
المتسقف وقالت أن إذا قتلت الطائرات الحربية 2 أو 3 من الإرهابيين فهي لن تقتل الإرهاب
بل سينتشر.ودعت الولايات المتحدة إلي دعم الديموقراطية في باكستان, وقالت
في النهاية يخسر الشرير ويفوز البطل, وهنا تأتي النهاية السعيدة.
حصاوي وتوته ..توته ..فرغت الحدوتة. لا حلوة ومسلية.دي بقي حدوتة قبل النوم؟.
المتسقف أه أنت تقصد تتريأ؟.
حصاوي ولما أوباما أو غيره يبطل يبيع سلاحه.الناس في أمريكا تعيش أزاي وتاكل منين؟.
المتسقف أمريكا من أغني بلاد العالم.
حصاوي وماله ؟ البحر يحب الزيادة.
المتسقف أفهم. في الحالة دي مش هيبقي فيه ضرورة للسلاح.
حصاوي وبعدين؟ يعملوا بالسلاح اللي بيصنعوه إيه؟ يرموه في البحر؟.ثم كتب إيه اللي يطبعها الأمريكان ويوزعوها بالمجان علي بلاد كتيره؟.
المتسقف أكيد كتب تدعو للسلام والمحبة. وكتب دينية لكن معقولة, مش متطرفة.
حصاوي ومش ناقص غير تقول لي بعدها الأمريكان هيسلموا ويخشوا دين الإسلام.
المتسقف هما مش هيوزعوها عندهم. هيوزعوها علي بلاد الشرق الأوسط. ومع ذلك والله مش بعيد. ليه لأ؟.
حصاوي وهو أنت شفت أوباما رد عليها؟.ما هي بنفسها قالت أنه ما ردش علي طلبها بشكل واضح.واكتفت بأن رده كان سياسي إلي حد ما كما هو دائما. يعني ما رضيش يكسفها ويكشف نفسه ولا هي كلمته بصراحة. مش لسه واخده نوبل.تزعل الناس
ليه بقي؟.
المتسقف يكفي أنها وصلت له الرسالة.
حصاوي يعني كنت عايز يرد عليها ويكسفها ويقولها ما تطبعوا أنتم الكتب دي وتوزعوها
عندكم عشان تقضوا علي الإرهاب؟الراجل كبر دماغه.وخدها علي قد عقلها وسنها
وبعدين ما تنساش أنها قالت له أنه يستطيع تغيير العالم. ودعت الولايات المتحدة إلي دعم الديموقراطية في باكستان.يعني أمريكا هي ربة الديموقراطية والحرية
والعدالة.
المتسقف طيب.لو أنت كنت في مكانها قدام أوباما وقدام الناس كنت هتقوله إيه بسلامتك؟
حصاوي كنت أقول له إحنا مش عايزين منكم لا فلوس ولا سلاح ولا كتب.عايزين حاجة
سهلة وبسيطة خالص.
المتسقف أيوه. إيه هي بقي؟.
حصاوي أطلب منهم ما يبتعوش جواسيس لبلادنا.وأطلب منهم ما يقفوش مع الإخوان
والسلفيين واللي زيهم ضد شعوبنا اللي بياخدوا منهم السلاح والفلوس اللي بتمولهم عشان يفجروا فينا القنابل ونفضل بلاد متخلفة أو بلاد نايمه وبكده يقدروا يأخدوا مننا كل حاجتهم ببلاش كده, ويقومونا علي بعض.
المتسقف أه دي نظرية المؤامرة بقي.
حصاوى دا صحيح. بس العيب مش فيهم. العيب فينا إحنا اللي ما بنطبعش كتب تشرح للناس الغلابة والأميين معني الدين اللي بيحض علي مكارم الأخلاق.ونراجع كل
التراث الديني اللي حرفوه لصالح الحكام ولصالح الشيوخ اللي حرفوه ويهبروا خزائن من الأموال لهم وللحكام ,وبسببهم خلونا متأخرين وعايش في القرون الوسطي.
المتسقف زى مين يعني؟
حصاوي يكفي اللي مش عايزينا نفعل المادة اللي بتحظر الأحزاب الدينية.
المتسقف قولي كام أسم منهم.
حصاوي يوه كتير قوي. ومنهم حضرتك.
( المتسقف يغشي عليه )
لينين الرملي
617
هرش مخ
الأحد 26 أكتوبر 14
1- عن الكتابة
إذا أردت أن تصبح كاتبا.أكتب أي كلام فارغ علي النت وأحرص علي
عدم القراءة لآخرين لتحتفظ بثقافتك !.
2 – اختبر ذكائك
كلية الزراعة تضبط بحرق قش الرز مخالفة القوانين.ولا بد أن تدفع غرامة
قد تصل إلي عشرة آلاف جنيه. تفتكر من سيدفعها؟!
3- دعاء
يا رب يطبقوا قانون التظاهر الأمريكي بحذافيره عندنا!.
4- معني التقدم
نحن الدولة الوحيدة التي يقوم فيها طلاب الجامعة بالتدريس للأستاذة والعمداء!.
مش ثورة ؟عمار يا مصر!.
5- حل جربناه ونجح
الحل لكل مشاكلنا أن نسارع وندخل حربا ولو محدودة مع إسرائيل لكي
نساعد حماس ومن جهة أخري تتوقف الاحتجاجات عندنا !.
6- القانون
مطلوب قانون يقنن الاختيار بين السماح بتهريب المخدرات أو تهريب الأسلحة.
وعدم الجمع بينهما!.
7- الجائزة
ظهر زياد بهاء الدين وصرح (بأن قانون التظاهر شق جبهة 30 يونيو وكان
من الأسباب الرئيسية لاستقالته من الحكومة) أصبر وسوف تنال جائزة نوبل
قريبا!.
