على خلفية تصريح الموسيقار حلمي بكر، والذي وصف فيه فناني الأندرجراوند بـ "الشحاتين"، و"معدومي الفن"، وغير معترف بهم، محدثًا زلزالًا من ردود الأفعال الغاضبة حول ما اعتبره جميع الفنانين المستقلين إهانة غير مقبولة بالمرة.
ومن جانبه، خرج الفنان هاني عادل، عضو فريق وسط البلد، والملقب بنقيب الفن المستقل، عن صمته، ليقرر الرد على تلك الإهانة، قائلًا في تصريح خاص لـ" بوابة الأندرجراوند":" بداية كده معنديش رد على كلامه، لأنه كلام ميستحق أصلا الرد، ولو هو فعلا شايف إن الفنانين المستقلين شحاتين، فممكن نبعتله صورنا واحنا على الاستيدج وبنغني ونوريهالو عشان نثبتله إننا لابسين كويس وبنتكلم طبيعي وناس عادية، وكمان هتاف الجمهور يثبتله إننا لينا شعبية، كلامه بالمجمل مش أكتر من شتيمة، ملهاش أي مبرر".
مبديًا استغرابه من تصريح حلمي بكر "الغريب"، والـ "المستفز"، بالرغم من كونه قامة فنية كبيرة، لا يصح أن يخرج منها مثل هذه الكلمات المهينة، قائلًا: " حلمي بكر موسيقار كبير، وليه تاريخه، وهو شخص المفروض "محترم"، وأنا أظن إن الكلام ده مكنش المفروض يطلع منه، أو ممكن نتغاضى عن الرد ونتخيل إن وصف "شحاتين" خانه في التعبير، واما بالنسبة لاعتباره إن كل الفرق لازم يعترف بيها بعد متتسجل بالنقابة، فاحنا وفنانين كتير متسجلين بالنقابة، وهي مش أملة يعني، وهي المفروض بتساعد الفنان عشان يطور شغله وتسهله إجراءات روتينية كتير في الحفلات، والمفروض إنها تحتضن الفنانين الموهوبين، وفيه فعلا مواهب موجودة أفضل بكتير من اللي موجودة في النقابة، لكن بعد كلامه ده أظن إنه خسر احترام الشباب، وخسر حتى فكرة إنه يستقطب المواهب دي في النقابة بدل ميشتمها".
كما أشار هاني إلى أن حلمي بكر فيما مضى كان يستمتع بحضور حفلات الأندرجرواند، ومنها حفلات وسط البلد، قائلًا: " قبل كده في حفلة من حفلاتنا زمان، كنا عاملينها بالنقابة، وأعضاء منها كانوا بيتفرجوا علينا ومستمتعين، ومنهم حلمي بكر، واللي جاب ولاده عشان يتصوروا معانا، فدي في حد ذاتها حاجة غريبة، فتقريبًا هو حاليًا المنصب بتاعه ميسمحلوش بالظهور إعلاميًا أو التليفزيون والصحافة، فحب يظهر بطريقة مستفزة، اللي أهان فيها الفنانين".
كما أكد هاني عادل افتخاره بكونه أحد الفنانين المستقلين، وأحد رواد عالم الأندرجراوند، قائلًا: " الأندرجرواند من وجهة نظري هو الموسيقى البديلة، وده التعريف الأشمل، لأنها بدأت كمزيكا بديلة عن العادي الدارج في الوسط الفني، وأنا بفتخر دايمًا إني واحد من القليلين اللي بدأو مشوارهم كأندرجراوند وفنان مستقل، واحانا كوسط البلد من أقدم الفرق في مصر، بقالنا أكتر من 17 سنة، فأنا بجد فخور إني خدت مغامرة إني أقدم فن مختلف وجديد، وزمايلي في الفرقة خدوا الريسك وكملوا معايا لغاية دلوقتي، فالأندجراوند والفن المستقل هو إيمان بفكرة تغيير، وتقديم شيء جديد بعيد عن العادي، وأي إهانة لأي فنان من الوسط ده مرفوضة".
