على خلفية وصف الموسيقار حلمي بكر لفناني الأندرجرواند والوسط المستقل بأنهم "شحاتين"، و"غير معترف بهم"، أبدى الفنان عادل ميخا، اعتراضه ورفض الفنانين المستقلين كل مثل هذا التصريح "الغير محترم".
وقال ميخا في تصريح خاص لـ" بوابة الأندرجراوند": "بكل بساطة كلام زي ده مينفعش أصلا يترد عليه، لأنك مينفعش ترد على شتيمة إلا بشتيمة، واحنا فنانين محترمين، ولكن أقدر أقول إن الكلام إلى اتقال في حق الفنانين المستقلين ووسط الأندرجراوند بشكل عام ده إهانة غير مقبولة بالمرة".
مضيفًا: " الأستاذ حلمي راجل كبير في السن، وليه تاريخه الفني، ومنقدرش نعقب على راجل "كبير" في كلامه ده، بس من الملحوظ دايمًا في كلامه وتصريحاته إن بيفضل يهاجم أي موهبة كويسة وخلاص، ونفسه دايمًا يهد فكرة الأندرجراوند عن الناس، لأنها فكرة ناجحة وفنانينها ليهم جمهور كبير جدًا، وهو متضايق من ده، لأانه شايف إن الجيل القديم والدماغ القديمة هي اللي صح وأي حاجة " شبابية" أو "ثورية" فاشلة، لكن الواقع أثبت إن فيه ثورة فنية قامت ومسحت كل المفاهيم الروتينية وإن الأندرجراوند قدر يخلق لنفسه كيان ومكان وجمهور بيزيد كل يوم".
كما أشار ميخا إلى أن وصف حلمي لفناني الأندرجراوند بأنهم شحاتين مثل شحاتين أوربا والمقصود بهم الفنانين المتجولين في شوارع أوربا ويقدمون عروضًا للجمهور، يعتبر في حد ذاته وصف خاطئ، لأن هؤلاء الفنانين الأوروبيين ليسو شحاتين، وإنما أصحالب مواهب، وحتى لو كانوا شحاتين فكل الناس والمسئولين هناك يدعمون الفن المستقل بكل الوسائل، في حين " عندنا نقابة بتهاجم الفن المستقل وبتشتموا ومش بتساعدوا بأي حاجة".
ووجه ميخا رسالة أخيرة للموسيقار حلمي قائلًا: " الأندرجراوند فكرة عمرها مهتموت، وهتكمل ونجاحها بيزيد كل يوم، وعمر مالفنانين المستقلين ما كانوا شحاتين، بالعكس بيقدموا فن محترم ورؤية جديدة وشبابية بروح مختلفة، ومع احترامي لحلمي بكر بس انت من جيل واحنا من جيل تاني خالص، والجيل بتاعنا قدر يثبت نفسه بجمهوره وفنه".
