- مساء الخير يا عمي.. أنا هنا عشان أتشرف وأطلب ايد سلمي بنت حضرتك
- نورت يا ابني
-- أنا مهندس كهربا، صحتي كويسة الحمد لله وظروفي مش بطالة، لكن في مشكلة صغيرة كدة
- خير ؟
-- أنا فامبير يا عمي.
- نعم ؟
-- فامبير يا عمي، مصاص دماء يعني من اللي بيعيشوا في توابيت خشب معفنة دول ويموتوا بفص توم
- ايه يا بني الهبل ده ؟؟ ما تحترم نفسك انت في بيت محترم !
-- أنا بكلمك بجد والنعمة، بس الحمد لله قضيت شهرين في منتجع الدكتور أحمد عكاشة اللي في التجمع ده وبقيت كويس.. والله يا عمي تحويشة عمري اللي عملتها في رومانيا ضاعت على العلاج
- (ينهض بغضب ) واضح اني ضيعت وقتي معاك ! اتفضل برة !
-- ( يظهر نابًا أزرق بوحشية ) اقعد يا راجل انت بدل ما أتغابي عليك، أنا في فترة نقاهة أصلا وممكن أنتكس عادي
- (يجلس مرعوبا ) انت.. انت.. عاوز مني ايه ؟؟
-- ولا حاجة يا أبو سلمي، جوزني بنتك بس
- يا بني مينفعش ! ما تتجوز مصّاصة زيك !
-- عملوها في توايلايت ونفعت والمصحف، منا قدامك زي الفل أهو وعروق صلعتك قاعدة تنطر في وشي من الصبح وأنا ولا الدموع.
- أسف يا ابني مقدرش
-- أنا عندي شقة في مدينتي واخدها تخليص حق، 160 متر صافي يرمح فيهم الخيل ومتشطبة محارة.. ولو عاوز تفرش من أيكيا آمين.
-- مرحلة أولى ولا تانية ؟
- لا التانية دي دخلت تمويل عقاري وايدك منها والأرض، مرحلة أولى وعدادها باسمي..و شبكة بنتك من داماس اسورة وانسيال وتوينز عيار 21
-- طب بص يا بني، الراجل ميعيبوش الا جيبه وحاجة تانية انت عارفها.. وانت ما شاء الله جيبك دفيان وقاعد قدامي زي التور، فامبير بقي مش فامبير دي حاجات رفيعة بينك وبينها منتدخلش فيها.
نقرا الفاتحة والمعوذتين ؟ ولا تتحرق ؟
- والله يا عمي مجربتش بس خلينا في الفاتحة أفضل، القميص ده كان آخر حتة لارج في زارا وحزعل عليه الصراحة لو اتلسع
-- وماله يا ابني، بسم الله الرحمن الرحيم..
