أصل ما تصدقنيش ليه؟! كدبت عليك في إيه قبل كدة؟! يا سيدي ولا حتى كدبت ما كل الناس بتكدب ما كدبتش أنت قبل كدة يعني؟!
أحلى أوقات قضيتها في حياتي كنت سايق ومشغل تكييفي ومولع سيجارتي وبسمع مزيكاتي وتايه وعمال ألف في الشوارع وبثقة شديدة أفوت يمين وأدخل اللي بعده وألاقي نفسي راجع لنفس النقطة اللي كنت فيها من شوية وبمنتهى القدرية ألاقي نفسي بختار نفس الاختيارات أفوت يمين وأدخل اللي بعده وفي الأخر ألاقي نفسي وصلت وبعد ما أوصل أسأل نفسي ها وبعدين؟! وما ألاقيش رد!! تخيل فيه واحد عبقري رد على السؤال ابن الكلب ده وقال ولا قبلين يخرب بيت دماغ امه
المهم إني في ظروف غامضة ألاقي نفسي تاني سايق عربيتي ومشغل تكييفي ومولع سيجارتي وبسمع مزيكاتي وتايه وعمال ألف في الشوارع بمنتهى الثقة ودايما دايما دايما وكمان مرة دايما آخر سكتي باب شقتي
كل سنة وأنت طيب عيد بقى وكدة وأنا عمري عمري عمري وكمان مرة عمري ما كنت مبسوط في العيد
تملي العيد يخليك تقابل ناس ما قبلتهمش من السنة اللي فاتت ويصدموك بأنك ماعملتش أي جديد من العيد اللي فات محاولة إنك تفهمهم إنك بتحب التوهان والوصول مش مريح شيء صعب يقولولك طب والعيال طب والمستقبل طب واحدة بنت حلال يا سيدي طب هدمة جديدة أي حاجة
وبرضو ماعندكش ردود خليك كدة لحد ما تصحى تلاقي نفسك عجوز زعلان على اللي فاته
يا بشر يا خلق يا ناس أنا دايما آخر سكتي باب شقتي لما أتوه مرة وما أرجعش ساعتها بس ممكن ترتاحوا وتعرفوا إني في اللحظة دي بعمل اللي إنتم عايزنه اللي هو احتمال كبير ابقى عايزه
أكتر من كدة وربك بيزيح وهانت تلاتة بالله العظيم هانت
