(المواطن الغلبان حسن حصاوي، يغشي عليه من حين لآخر. وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشى عليه).
( حصاوي جالس بالمقهى، يحضر شاب ويسأله عن المثقف، فيرحب به حصاوي)
حصاوي: زمانه جاي اتفضل ارتاح.
الصديق: شكرا.. حضرتك صاحبه؟.
حصاوي: أه أمال.
الصديق: يعني معاه في نفس الأيدلوجية ؟
حصاوي ( وهو يخفي ضحكته) إلى حد ما.. وحضرتك معاه في نفس الأيدلوجية؟ ؟
الصديق: مؤكد.. وتعلمتها على إيديه.
حصاوي: وحضرتك بقي في حزب إيه؟.
الصديق: مش بالظبط .. إنما تقدر تقول إني ثوري حر.
حصاوي: عظيم.. وحضرتك بتشتغل إيه غير إنك ثوري حر؟
الصديق: تقدر تقول إني ناشط سياسي.
حصاوي: عظيم.. بالمناسبة انتخبت مين في انتخابات الرئاسة؟.
الصديق: أنا شخصيا ما انتخبتش حد.
حصاوي: إزاي بقى؟
الصديق: أنا فعلا رحت الانتخابات ووقفت في الطوابير في عز الحر.. لكن كان عندي ميعاد مهم فاضطريت أمشي وأرجع تاني يوم.
حصاوي: مش فاهم.. ورجعت ليه تاني يوم، لما أنت مش ناوي تنتخب حد؟
الصديق: عشان أبطل صوتي طبعا.
حصاوي: يا سلام؟
الصديق: جايز تقول أن دا موقف سلبي.. لكن أنا ما وقفتش عند هذا الحد.. إنما كتبت رأيي الصريح علي ورقة الانتخابات.
حصاوي: حضرتك بتشتغل إيه؟
الصديق: أنا في نهائي هندسة.. كان ممكن أتخرج من تلات سنين.. لكن أنت عارف ظروف البلد كانت ومازالت مرتبكة.. واضطريت انشغل بأحوالها.
حصاوي: برافو وعملت إيه بقى؟
الصديق: عملت كتير لأني كان لازم أقوم بدوري في المرحلة دي.
حصاوي: زي إيه؟
الصديق يكفي أقولك أني كنت على رأس كل المظاهرات اللي طالبت بإلغاء قانون التظاهر.
حصاوي: وتفتكر جاب نتيجة؟ ما هو قانون التظاهر ساري لحد دلوقت.
الصديق: لا جاب نتيجة ساحقة بدليل أن الدولة العميقة لم تنجح لحد الآن أنها توقف حركات الاحتجاج أو التظاهر.
حصاوي: بس قانون التظاهر ما يمنعش التظاهر إنما بيحط له قواعد بس.
الصديق: ونحن نرفض أي قوانين مقيدة للحريات.
حصاوي: لكن القوانين دي موجودة في كل الدول المتقدمة.
الصديق: ما لناش دعوة بغيرنا.
حصاوي وهو احنا أحسن من غيرنا؟
الصديق: وليه ما نكونش أحسن منهم؟ وعشان إيه ناخد إذن بالتظاهر من الشرطة.؟
حصاوي: أمال من مين؟ ثم دي عملية تنظيم مش أكتر.
الصديق: التنظيم بتاعنا هو اللي يقرر نتظاهر إمتى وفين وليه وازاي؟.
حصاوي: بس كده تحصل فوضى.
الصديق: وإذا كانت الفوضى ماليه البلد؟ جت علينا إحنا؟
حصاوي: طب ما هو الإخوان كل يوم والتاني يعملوا مظاهرات جوه الجامعة وبره الجامعة
أنت معاهم ؟
الصديق: إطلاقا إحنا ما لناش دعوة بيهم. إحنا قضيتنا الحرية ولن نتنازل عنها.
حصاوي: طب مش الأحسن كنت تختار رئيس يديك الحرية ؟
الصديق: وهو فين الرئيس دا؟ ما ادناش الحرية ليه ؟
حصاوي: مش لما ييجي الأول ؟ طب كنت تنتخب حمدين مثلا.
الصديق: بالعكس.. إحنا لنا الفخر إننا حصلنا على أصوات أكتر منه. ودا أكبر دليل على أننا الكتلة الثورية في هذه المرحلة والمفروض هو اللي ينضم لنا.
حصاوي: بس الأصوات الباطلة فيها كتير من الأميين اللي ما كانوش قاصدين يبطلوا أصواتهم لأنهم أول مرة يخوضوا الانتخابات.
الصديق: لو دا صحيح كانت اللجنة أثبتته.
حصاوي: وفيه كتير من السلفيين عملوا زيكم وأبطلوا أصواتهم لأن مالهمش مرشح.
الصديق: مالناش دعوة بالسلفيين.. ولأ بأي فصيل آخر غيرنا..إحنا فصيل مستقل عن الجميع يعبر ويمثل شباب الثورة.
حصاوي: يعني بقية الجماهير اللي مش من الشباب أو الكبار، مش في دماغكم خالص؟
الصديق: كلهم هينضموا لنا في المرحلة اللي جاية.. وأنا جاي لصاحبك عشان أنصحه ينضم لينا في تكتل المبطلين الثوري.. بالمناسبة انت ما عرفتنيش بنفسك.
حصاوي: أنا واحد غلبان من بقية الشعب.
الصديق أيوه يعني موقفك إيه؟ انتخبت مين ؟
حصاوي: ما قلت لك واحد من الشعب.. لسه ما فهمتش؟
الصديق: لا.. وأفهم منين؟
حصاوي: يعني زي الملايين.. انتخبت السيسسي. أجيب لك تشرب قهوة سادة؟
(الصديق يغشى عليه)
763
لينين الرملي
هرش مخ
الأحد 8 يونيه 14
1ـــ الناصري السعيد
واحد ناصري مثل حمدين، سعيد أن السسيي لم يحصل على ما كان يحصل عليه ناصر
في الاستفتاءات!
2ـ التسريبات
من يخشى من مراقبة النت. هم الذين ينشرون الصور الفاضحة والذين يخشون من
تسريبات عبد الرحيم علي مكالمات الخونة!
3ـــ قانون جديد
يعاقب من يلقي بالقمامة والمخلفات فيلوثون الطرق. المفروض تطبيقه أيضا على كل
الذين لوثوا سمعة مصر!
4ـــ شعار المعركة القادمة
المؤيدون لحمدين يتكتلون تحت شعار احنا اللي أخذنا أصوات 3 % . عملا بالمثل
القائل إذا لم تستح فقل ما شئت!
5 ــ الدور القادم
مظاهرات إخوانية محدودة تطالب بعودة مرسي فاشتبك معهم الأهالي. الدور القادم
على مظاهرات الشباب دون تصريح!
6ـــ أسم علي مسمى
الأخبار تقول أن (مرسي العياط) أصيب بالإحباط بعد فوز السيسي. سبحان الذي
أختار له اسم العياط!.
7ــ القط والفار
السلفيون يتحدون قانون الخطابة في المساجد ويعتلون المنابر قسرا عملا بالمثل المعروف
إن غاب الإخوان العب يا فار !.
