من غير مانتكلم كتير
أنا نفسى أسمع يوم قرار
أو رأى ليك واحد يتيم
مش ألف رأى فى الاختيار
طبعا هتسأل هو مين؟ هاقول لك ده نادر بيه بكّار..
ماقصدش أبدا ليك تجريح
معلش قلمى شويه صريح
شايفاك بتتلوّن ميت لون
مع كل شكل وصنف ولون
وده كله باين فى التصاريح
شوفتك كتير فى قناة الناس
بتشيد بمرسي فى كذا إنجاز
وكنت مع ان الشرعيه تفضل لفترتها الرئاسية
يعنى يكمل مرسى رئاسة
على ميت شهيد وحداد وجنازة
لكن خلاص جه يوم تلاتين
وبعد ما نزلت الملايين.. غيرت رأيك !!
علشان نكون واضحين على نور
عارفاك وافقت على الدستور.. ومعانا وانت في حزب النور
ما تستغربش !! حزبك ده نصه مابيفسّرش ...
الكل سايب مخه معاك
ناس تايهة لكن ماشية وراك
هتقول شمال وان قولت يمين هيقولوا إحنا وراك وآمين
عشان انت أذكى ومابتخسرش..
شايفينك انت من الشطار
مايعرفوش جايز مكار
هتكون معاهم وبكرة عليهم
ودليل كلامى
فى كل حوار ..
باستأذنك .. بكفايه شخابيط
مش كلّه عقله جنان وعبيط
فى ناس كتير شايفاك تعبان عرفت تسجل لك ألوان
من كل برنامج عالدش
عارف طلعت بكام ميت وش؟
أرد أنا ولاّ انت تقول؟
علشان ساعتها تكون مسئول
ومن ردودك برضه تبان
دلوقتى مع مين والإخوان
شايف إيه فيهم غير الكدب؟
ورأيك أنت تكون محظورة
ولاّ شايفها جماعه مطيورة؟
وبجد إيه هى الأسباب..اللي يبررها الإرهاب؟ والدم فيها دليل الصورة
ياريت أشوفك بقه دلوقتي
كتير شوية فى ناس عايزاك..وقل بصوتك كده سمّعنى
فى ناس معايا مستنياك
مستنية لك كام تصريح
ويكون كمان واضح وصريح
وشايفها ثورة ولاّ انقلاب ..
علشان كده بضربة قلم
هنسيبك انت للحكم
وأنا قولت رأيي وحرة فيه
علشان أنا صاحبة قلم.
