أجابت “هيئة الإسعاف المصرية” ، على أسئلة هامة جدا يسألها بعض المواطنين عن الخدمات الإسعاف الطارئة المجانية.
وقالت هيئة الإسعاف فى بيان لها : "من حقك كمواطن تعرف الدولة بتقدملك إيه من خدمات مجانية، وتحديداً في الخدمات اللي بتمس حياتنا بشكل مباشر، السؤالين اللي بيطرحوا كتير علينا من المواطنين ليهم نفس المعنى ونفس والإجابة كالتالى :
" احنا هيئة حكومية غير هادفة للربح، وعلشان تفهم الإجابة هنعرضلك 3 نماذج معداش عليها غير أيام قليلة، القاسم المشترك بينها إنها تدخلات حرجة جداً كانت حياة بعض الناس فيها على المحك والقاسم التاني إنها كلها تمت بشكل مجاني بدون تحمل المواطن أي تكلفة او رسوم.
النموذج الأول: من محافظة الفيوم .
إستغاثة اب بأن بنته اللي مكملتش شهر مبتتحركش نهائي، على الفور طقمنا لبت إستغاثة الأب، وبالفعل الطفلة كانت حرفياً بتلفظ أنفاسها الأخيرة، جراء توقف تام في عضلة القلب وانعدام لكافة العلامات الحيوية الدالة على الحياة من نبض ونفس، ثواني كانت الطفلة جوا عربيتنا ورجالتنا بدأو في إنعاش قلبي رئوي للطفلة وحطوها على جهاز المونيتور وفتحوا ممر الهوى ليها وبدأ يظهر نبض الطفلة وتحسن في تنفسها ووصلوا بالطفلة للمستشفى على قيد الحياة، والرد على سؤالكم هنا تكلفة الخدمة دي كام ؟
مجاناً ،بدون اي رسوم او مصاريف، أغلى حاجة هنا كانت حياة الطفلة " جودي " وعودتها للحياة.
النموذج التاني: من محافظة دمياط.
إستغاثة عن حالة ولادة داخل المنزل، لحظات وكان رجالنا في موقع البلاغ، والمفاجاة الأم بتولد بالفعل، ومستحيل نقلها في الوضع المتأزم دا، وبالفعل تمكن فريقنا الإسعافي من مساعدة الأم لوضع طفلها في ولادة طبيعية داخل منزلها، ومكتفوش بكدا نقلوا الأم والطفل للمستشفى للاطمئنان عليهم. ومن غير ما تسأل!!! مجاناً كل دا مجاناً.
النموذج الثالث: من محافظة بني سويف.
حادث مؤلم أطاح بشاب في مقتبل العمر، الحادث كان من القسوة والشدة انه حول جزء من جسد الشاب لأشلاء، والأمل شبه ضعيف، وبالرغم من كدا، اطقمنا أصرت على إنقاذ الشاب، عملوا إنعاش قلبي رئوي ليه، حاولوا إيقاف شلال الدم المتدفق من جسده، حرفياً كانوا بيجاهدوا للوصول بيه للمستشفى وبالفعل وصلوا وتولى الأطباء الأمر بالاستقبال، ونفس الأمر مفيش تكلفة أو رسوم.
احنا مين ؟؟
احنا تجسيد حي لمبدأ دستوري هام وهو حق المواطن في العلاج بشكل لائق.
رسومنا وتكلفة خدماتنا؟؟
ببساطة أي مصاب في حادث او حالة مرضية مفاجئة بنتكفل بنقله وإسعافه لأقرب مستشفى تابع لوزارة الصحة مجاناً.
مين بيتحمل التكلفة الفعلية؟
مصر، او بمعنى سليم إقتصادياً ( الموازنة العامة للدولة بتتحملها عن المواطن ).
في خدمات برسوم في الإسعاف؟؟
في بعض الخدمات برسوم رمزية يعني مدعومة بشكل كبير والمواطن بيضع مساهمة رمزية لا تضاهي التكلفة الفعلية للخدمة، والخدمات دي زي نقل المريض للسكن او لإجراء فحوصات او أشعة ....وكل ما يعتبر خدمات نقل لحالات مستقرة طبياً وصحياً.
عارف سؤالك اللي جي .طب المواطن غير المقتدر اللي بيحتاج بعض الخدمات دي وميقدرش يدفع ؟؟؟
بنفحص حالته وبنتأكد من عدم مقدرته وبنعفيه من الرسوم، عايز اقولك أن في عام ٢٠٢٢ تكفلنا بنقل أكثر من ١١٤٠ مريض غسيل كلوي غير قادر على الحركة مجاناً لمراكز غسيل الكلى ولمنازلهم بتكلفة إجمالية تفوق الأربعين مليون جنيه.
يمكن البوست طويل نسبياً، لكن كنا لازم نشارككم بعض من مشاق مهنتنا ورسالتنا، وتوضيح عملي لمفهوم هيئة غير هادفة للربح.
