فتحت إشارة سيدى بشر
البحر المقفول عادى
فاتح ف قلبى ومشيد جدران وبيوت
المُعدات ع الرصيف
والسمسم المبدور على جبين النرجس قصادى
يا مريض ب الضحكة واللمة وفتح الخزاين
واضح وباين
أنا متأخر دلوقتى ع الشغل
وبنات أفكارى صراخ مكتوم
وأنا أب مثالى
مش دارى حتى ب أحوالى
و لا حاسس صيف
الحر طراوة جسم إنهد
وعليل القلب دواه ساتر
فرفط رمان
إرقص حواليك
نفس الأشياء
نفس الكَرَه
الغِل ب يكسر ف الجرَة
والضِل ثبات
ميت ب يصحى ف أموات.
بليد واقف ف أول صف
وجدران السما محاوطاه
يخطى سور
يلاقى سور
غبا علاه
غريب المشهد البايخ
فريسه وخمسميت صياد
و أغبى من ف خلق الله ذليل العشق
ب يفرح من دفا صاهد
ويخجل من خريف محتوم
ألبوم صور خالى من الأطفال
وعيال سكك باينين ف مشهد رعب
إشحن غباك ب كتير
وقليلك الضحكة
احمى ب خوف جلدك من حريق الروح
