نفى الفنان عمرو محمود ياسين ماتردد عن منع أسرته للفنانة نجلاء فتحي من حضور عزاء والده الفنان القدير محمود ياسين.
وكتب عمرو على صفحته الرسمية بموقع التواصل الاجتماعي فيسبوك: "اشاعة سخيفة ع السوشيال ميديا يتبناها بعض أصحاب قنوات اليوتيوب اللي بتحب تعمل ترندات، وتألف كلام فاضي، مفاد الاشاعة ان انا وامي واختي رفضنا ان الفنانه الكبيرة الغالية علينا جميعا نجلاء فتحي تحضر عزاء الوالد رحمة الله عليه.. طبعا انا مذهول من التأليف والتلفيق والقدرة الرهيبة على الكذب واختلاق القصص الوهمية.. شيء في منتهى السخافة".
وتابع: "اولا الفنانه نجلاء فتحي مبتعده عن الظهور في المناسبات العامة من فترة ثانية هي مقربة من الاسرة وبينا وبينها صلة نسب.. فا ايه السذاجه والعبط ده ؟! والمشكلة ان الناس بتصدق.. الكلام ده غير حقيقي والسيدة نجلاء فتحي قامت بواجب العزاء تليفونيا ولها منا كل التقدير والحب والاحترام".
واختتم حديثه: " احب اضيف كمان ان في اشاعه برضه ان في مشكلة حصلت مع الفنان عادل امام لما وصل العزاء ده برضه محصلش الفنان عادل امام لم يحضر العزاء وحضر نجله المحترم رامي امام، وايضا حكاية ان شقيقتي رانيا اتخانقت مع اميرة مختار ابنة الراحلة العزيزه رجاء الجداوي.. ده برضه محصلش نهائي وكان حوار بينهم عادي جدا، واتقوا الله في الكلام اللي بتقولوه للناس يا بتوع الترندات البايخة ".
وتوفي الفنان القدير محمود ياسين منذ أيام عن عمر يناهز الـ79 عامًا.
