اعتبر الإعلامى أحمد شوبير، حارس مرمى النادى الأهلى ومنتخب مصر السابق، السبعة أشهر الأخيرة له فى اتحاد الكرة "أسوأ فترة فى حياته الإدارية"، وقال شوبير فى برنامجه الإذاعى عبر أون سبورت، "السبعة أشهر الأخيرة لى فى الجبلاية من أسوأ فترات حياتى الإدارية مع اتحاد الكرة، بجد كان فيه تصرفات غير صحيحة، وهحكى بالتفاصيل موقفين يأكدوا كلامى، الأول خاص بالنادى الإسماعيلى حينما طلب تأجيل مباراة فى الدورى بداعى امتلاكه مباراة أفريقية فى الكاميرون، رغم وجود متسع من الوقت للعب المباراتين بسهولة ودون عناء، ليكون الرد لمسئولى الإسماعيلى ابعتوا لينا جواب قولوا فيه إن فيه تأخير فى الطيران وسيتم الموافقة على تأجيل المباراة وهو ما حدث بالفعل".
وأضاف شوبير، "مين يكره الإسماعيلى، محدش طبعاً، بس مين ميحبش النظام؟، أما الموقف الثانى فهو خاص بنادى الزمالك الذى طلب من مسئولى الجبلاية تأجيل بعض من مبارياته واتقاله ابعت جواب وهنوافق، وبالفعل حصل، ولما الأهلى يعترض يقولوله اصبر بس وهنأجل ليك، عرفتوا إزاى كيف تدار المسابقة عندنا، ونرجع نقول عندنا ماتشات كثيرة ومش عارفين نكمل الدورى بسبب كورونا، لأ مش بسبب كورونا بسبب تأجيلاتك الكتير، وإن مفيش نظام تمشى بيه المسابقة من البداية".
وتابع حارس الأهلى السابق، "أتذكر أن سموحة طلب أن يدير مباراته فى نهائى الكأس منذ موسمين طاقم تحكيم أجنبى، واتحاد الكرة قاله ابعت الفلوس وفعلا بعت، وبعد كدا قالوله مش هنجيب حكام أجانب عشان اللائحة مفيهاش كدا وفى الموسم اللى بعده 30 مباراة أدارها حكام أجانب".
